OMM Redaksiyası
ABŞ rəsmiləri Hörmüz boğazından keçən gəmilər üçün yeni təhlükəsizlik və ödəniş mexanizmlərini nəzərdən keçirir.
"Operativ Məlumat Mərkəzi-OMM" "Politico" nəşrinə istinadən xəbər verir ki, Ağ Ev gəmi sahiblərini yenidən bu marşrutdan istifadəyə təşviq etmək məqsədilə müxtəlif variantlar üzərində işləyir.
Müzakirə olunan əsas planlardan biri gəmilərə əlavə ödəniş müqabilində sürətli və təhlükəsiz keçid hüququnun verilməsidir.
Bu təşəbbüs çərçivəsində, ticarət gəmilərinin boğazdan keçərkən ABŞ hərbi gəmiləri tərəfindən müşayiət olunması variantı da gündəmdədir.
Belə bir addımın atılması, bölgədəki gərginlik fonunda gəmiçilik şirkətlərinin etimadını bərpa etmək və logistik axını sabitləşdirmək məqsədi daşıyır.
ABŞ və İran arasında davam edən diplomatik danışıqlar prosesində bu məsələnin xüsusi yer tutduğu bildirilir.
Xatırladaq ki, ABŞ kəşfiyyatı daha əvvəl İranın Hörmüz boğazını istənilən an bağlamaq imkanına malik olduğunu bəyan etmişdi. Məhz bu təhlükə fonunda Vaşinqtonun boğazda hərbi iştirakını və nəzarətini gücləndirməyə çalışdığı qeyd olunur.
