ABŞ Hərbi Dəniz Qüvvələrinə məxsus “USS Benfold” esminesinin ötən ay Cənubi Çin dənizində bir neçə gün ərzində tamamilə elektriksiz qaldığı açıqlanıb.
“Operativ Məlumat Mərkəzi-OMM”xəbər verir ki, bununla bağlı xarici KİV məlumat yayıb.
Bildirilib ki, ABŞ Hərbi Dəniz Qüvvələrinin 7-ci Donanmasının sözçüsü komandir Metyu Komer Cənubi Çin dənizində xidmət aparan “USS Benfold” ilə bağlı açıqlama verib.
Komer bildirib ki, iyulun 24-də generatorlarda yaranan texniki nasazlıq səbəbindən gəmidə elektrik enerjisi tamamilə kəsilib.
Onun sözlərinə görə, ekipaj üzvləri bir neçə gün ərzində içməli su, qida, tualet və kondisionerlə bağlı ciddi çətinliklərlə üzləşib.
Bununla belə, hadisə zamanı heç bir hərbçinin xəsarət almadığı qeyd olunub.
Komer qeyd edib ki, Filippindəki limanlardan birinə aparılan gəmiyə elektrik enerjisi yalnız iyulun 30-da bərpa olunub. Gəmi bir həftə sonra yenidən əməliyyatlara başlayıb.
