Afət Ziyadqızı
Madridin Opera rayonunda, Calle İleras küçəsində yerləşən binada baş vermiş uçqun nəticəsində ən azı altı mərtəbə çöküb. Hadisə nəticəsində dağıntılar altında qalanların olduğu ehtimal edilir.
"Operativ Məlumat Mərkəzi-OMM" xəbər verir ki, bu barədə ''El País'' qəzeti məlumat yayıb.
Hazırda itkin düşənlərin sayı dəqiq məlum deyil, lakin ilkin məlumatlara görə, ən azı bir nəfər dağıntılar altında qala bilər, bu sayın daha çox olması da istisna edilmir.
Hadisə zamanı binada təmir işləri aparıldığı bildirilir.
Hadisə yerinə çox sayda yanğınsöndürən və tibb briqadaları cəlb olunub. Şahidlər binanın uçmasından əvvəl güclü vibrasiya hiss etdiklərini və sonradan küçənin üzərində qalın toz buludunun əmələ gəldiyini bildiriblər.
Çökmənin səbəbləri ilə bağlı araşdırmalar davam edir. Hazırda tələfat və xəsarət alanlarla bağlı rəsmi məlumat yoxdur.
