Tailandda sahildən təxminən 25 km məsafədə dənizdə olan yanan turist gəmisindən 26 nəfər xilas edilib.
"Operativ Məlumat Mərkəzi-OMM" TASS-a istinadən xəbər verir ki, bu barədə “Naewna” qəzeti məlumat yayıb.
Hadisə krallığın cənubunda yerləşən Phanqnqa əyalətində baş verib. Gəmidə açıq dənizə dalğıclıq üçün yola çıxan 10 heyət üzvü və 16 turist olub. Alt və orta göyərtələri əhatə edən yanğın baş verdikdən sonra onlar xilasetmə qayığına minib və yaxınlıqdan keçən gəmi tərəfindən xilas ediliblər. Gəmidə olan insanlardan heç biri xəsarət almayıb. Yanğının səbəbi hələ müəyyən edilməyib.
Phanqnqa əyalətində dalğıclıq həvəskarlarını 1984-cü ildə batmış və 20 metr dərinlikdə dənizin dibində olan 60 metrlik “Boon Sung” texniki gəmisi cəlb edir.
