Serbiyanın müdafiə naziri Miloş Vuçeviç bildirib ki, Baş Qərargah məcburi hərbi xidmətin bərpası təşəbbüsü ilə ölkə prezidenti Aleksandr Vuçiçə müraciət edib.
"Operativ Məlumat Mərkəzi-OMM" bu barədə "N1" telekanalına istinadən xəbər verir.
Müdafiə nazirinin sözlərinə görə, bu qərar ölkənin təhlükəsizliyinin qiymətləndirilməsi əsasında müəyyən edilib.
"Biz ehtiyatlarımızı artırmalıyıq. Bizim təhlükəsizliyimiz üçün bizə hər zaman ölkəni müdafiə etməyə hazır olacaq yeni əsgərlər lazımdır", - Vuçeviç bildirib.
O, bir çox Avropa ölkələrində icbari hərbi xidmətin tətbiqi tendensiyasını qeyd edib. Vuçeviç nazirlik məcburi xidmət müddətinin 4 aydan çox olmamasını tövsiyə edib.
