“Panama azad iqtisadi zonaların yaradılması və inkişafı, ölkənin işğaldan azad edilmiş ərazilərinin bərpası istiqamətində Azərbaycanla əməkdaşlığa hazırdır”.
"Operativ Məlumat Mərkəzi-OMM" xəbər verir ki, bunu Panamanın Azərbaycandakı səfiri Mariela del Karmen Sagel Rosas deyib.
“Sentyabrda Bakıya Panamadan (“Head ProPanama”) missiya gələcək. Bu missiya turizm sahəsində potensialı nümayiş etdirəcək, azad iqtisadi zonalar sahəsində əməkdaşlıq müzakirə ediləcək. Biz işğaldan azad edilmiş ərazilərin bərpasına xüsusi diqqət yetirmək istəyirik. Azərbaycan ərazilərində bu sahədə bilik və təcrübə mübadiləsi aparmaq istəyirik”, - o bildirib.
Panamada 12 azad zona var və onlardan ən böyüyü Kolon Azad Zonasıdır.
Səfirin sözlərinə görə, Azərbaycan və Panama təhsil, “yaşıl enerji”nin inkişafı və s. sahələrdə də əməkdaşlıq edə bilər.
O, xatırladıb ki, 1976-cı ildə Panama Qoşulmama Hərəkatının Şri-Lankada keçirilən sammitində iştirak edib və bu, həmin vaxt ABŞ-la danışıqlar aparan Panama üçün əlamətdar hadisə olub.
Diplomat vurğulayıb ki, Azərbaycan hazırda Qoşulmama Hərəkatında mühüm rol oynayır.
