Qırğızıstan və Azərbaycanın gömrük xidmətləri əməkdaşlıq etmək niyyətindədir.
"Operativ Məlumat Mərkəzi-OMM"-in Qırğızıstan mətbuatına istinadən verdiyi məlumata görə, bu barədə Qırğızıstan Dövlət Gömrük Xidmətinin rəisi Samat İsabekov Bişkekdə keçirilən Xəzər İnvestisiya Forumunda (“Caspian Investment Fоrum Bishkеk”) bildirib.
Onun sözlərinə görə, bu tədbirin keçirilməsi Qırğızıstan-Azərbaycan iqtisadi əlaqələrinin inkişafı baxımından əhəmiyyətlidir: “İki ölkə arasında tranzit potensialını inkişaf etdirmək və işgüzar əlaqələrin qurulmasına səy göstərmək lazımdır”.
S. İsabekov hesab edir ki, Qırğızıstan Çin və Azərbaycan arasında əlaqələndirici həlqə ola bilər və bunun vasitəsilə Türkiyə və Avropaya yol açıla bilər: “Biz gömrük proseslərini sadələşdirməli və bununla da beynəlxalq ticarətin inkişafına töhfə verməliyik. Bu məqsədlərə gömrük proseslərinin avtomatlaşdırılması və rəqəmsallaşdırılmasının tətbiqi ilə nail olmaq olar. Həmçinin, iki ölkənin sahibkarları ticarət əlaqələrini inkişaf etdirməyə təşviq edilir və onlara zəmanət verilir”.
