Rusiya Prezidenti Vladimir Putin Aşqabadda Türkmənistan Prezidenti Serdar Berdiməhəmmədovla görüşüb.
"Operativ Məlumat Mərkəzi-OMM" xəbər verir ki, bu barədə Kremlin veb saytı məlumat yayıb.
Dövlət başçısı Beynəlxalq Sülh və Etimad İli, Beynəlxalq Neytrallıq Günü və Türkmənistanın daimi neytrallığının 30 illiyinə həsr olunmuş forumda iştirak etmək üçün Aşqabada dövlət səfəri edib.
Səfəri zamanı Rusiya lideri "Sülh və Etimad: Davamlı Gələcək Naminə Məqsəd Birliyi" mövzusunda Beynəlxalq Forumun sessiyasında çıxış edib. Rəsmi tədbirdən əvvəl Türkmənistan Prezidenti Beynəlxalq Forumda iştirak edən nümayəndə heyətlərinin rəhbərlərini salamlayıb və kollektiv foto çəkdirib.
Forumdakı çıxışından sonra Putin Türkmənistan Prezidenti ilə ayrıca görüş keçirib. Onların danışıqları Kremlin əvvəllər elan etdiyi bir sıra ikitərəfli görüşlərin başlanğıcını qoyub.
