Kreml ABŞ ilə nüvə təhdidləri barədə polemikaya cəlb olunmaq istəməzdi, çünki hamı nüvə ritorikası ilə bağlı ehtiyatlı olmalıdır.
"Operativ Məlumat Mərkəzi-OMM" Rusiya KİV-inə istinadən xəbər verir ki, bunu Rusiya Prezidentinin mətbuat katibi Dmitri Peskov ABŞ Prezidenti Donald Trampın RF Təhlükəsizlik Şurasının sədr müavini Dmitri Medvedevin bəyanatlarına cavab olaraq iki nüvə sualtı qayığını Rusiyanın daha yaxınlığına göndərilməsinə dair bəyanatını şərh edərkən bildirib.
"Rusiya nüvə silahlarının yayılmaması mövzusuna çox diqqətlə yanaşır və hesab edirik ki, hamı nüvə ritorikası ilə bağlı çox ehtiyatlı olmalıdır", - o qeyd edib.
Peskov qeyd edib ki, "ABŞ-nin sualtı qayıqları onsuz da döyüş növbəsindədir, bu, daimi prosesdir".
Bundan başqa, o, Tramp və Medvedev arasında sosial şəbəkələrdəki polemika ilə bağlı deyib ki, Rusiyanın xarici siyasət məsələlərində Prezident Vladimir Putinin bəyanatlarına istinad etmək lazımdır.
"Əlbəttə ki, əsas olan Prezident Putinin mövqeyidir. Ölkəmizdə xarici siyasəti dövlət başçısı - Prezident Putin müəyyən edir", - Peskov Medvedevə xarici siyasətlə bağlı bəyanatlarında tonu azaltmağı məsləhət görmək niyyətində olub-olmadıqları sualına cavab olaraq bildirib.
