Özbəkistanın tarixi Səmərqənd şəhərində Birinci Avropa İttifaqı (Aİ)-Mərkəzi Asiya Sammiti öz işinə başlayıb.
"Operativ Məlumat Mərkəzi-OMM" xəbər verir ki, bu barədə xarici KİV məlumat yayıb.
Özbəkistan Prezidenti Şavkat Mirziyoyevin ev sahibliyi etdiyi və Səmərqənddəki konqres mərkəzində keçirilən toplantıda Qazaxıstan Prezidenti Kasım Comert Tokayev, Qırğızıstan Prezidenti Sadir Çaparov, Tacikistan Prezidenti Emomali Rəhman, Türkmənistan Prezidenti Serdar Berdiməhəmmədov, Avropa İttifaqı Şurasının sədri Antonio Kosta, Avropa Komissiyasının sədri Ursula fon der Leyen və beynəlxalq maliyyə qurumlarının rəhbər şəxsləri iştirak ediblər.
Tədbirin açılışında çıxış edən Mirziyoyev bildirib ki, əsrlər boyu Böyük İpək Yolu marşrutunun qovşağında yerləşən və Şərqlə Qərb arasında mühüm dialoq, sivilizasiya, diplomatiya, ticarət və mədəni mübadilə mərkəzi olan Səmərqənddə keçirilən bu görüş dinamik və gözlənilməz qlobal proseslərin cərəyan etdiyi bir mühitdə baş tutub.
Mirziyoyev ifadələrində deyib:
"Bu gün biz geosiyasi gərginliyin, təhlükəsizlik çağırışlarının, böyük regional münaqişələrin və davamlı inkişafa sosial-iqtisadi təhdidlərin artmasının şahidi oluruq. Aydındır ki, genişmiqyaslı beynəlxalq əməkdaşlıq olmadan heç bir regionun belə mürəkkəb problemləri müstəqil həll etmək imkanı yoxdur. Bu kontekstdə Mərkəzi Asiya və Avropa İttifaqının ənənəvi tərəfdaş olduğunu vurğulamaq istərdim".
Ukrayna üçün başladılan həll prosesini dəstəklədiklərini qeyd edən Mirziyoyev, "Ukrayna ətrafındakı vəziyyətin sülh yolu ilə həlli üçün danışıqlar prosesinin başlanmasını alqışlayır və tam dəstəkləyirik. Çox mürəkkəb və çətin məsələlərin həll edilməsinin lazım olduğunu bilirik, lakin diplomatik səylər və siyasi həlldən başqa alternativ görmürük" deyib.
