Afət Ziyadqızı
Türkiyənin xarici işlər naziri Hakan Fidan NATO Zirvəsi və regional gündəmlə bağlı açıqlamalar verib.
“Operativ Məlumat Mərkəzi-OMM” xəbər verir ki, Hakan Fidan bu barədə “The New York Times” qəzetinə müsahibəsində danışıb.
Məlumata görə, nazir Türkiyə Prezidenti Rəcəb Tayyib Ərdoğan ilə ABŞ Prezidenti Donald Tramp arasında mövcud olan şəxsi münasibətlərin NATO daxilində fikir ayrılıqlarının aradan qaldırılmasına töhfə verə biləcəyini bildirib.
Bildirilir ki, Fidan bu münasibətlərin təkcə Ankara və Vaşinqton üçün deyil, bütövlükdə NATO-nun maraqları baxımından əhəmiyyət daşıdığını vurğulayıb.
Qeyd olunur ki, Türkiyənin xarici işlər naziri Donald Trampın alyansla bağlı tənqidi mövqeyinə baxmayaraq, Ankara sammiti çərçivəsində keçiriləcək texniki müzakirələrin problemsiz keçəcəyinə inandığını ifadə edib.
Məlumata əsasən, Hakan Fidan Avropanın təhlükəsizliyi məsələsinə də toxunaraq, NATO-nun qitənin müdafiəsində mühüm rol oynadığını bildirib. O qeyd edib ki, Avropa İttifaqı daxilində müdafiə sahəsində əməkdaşlığın genişlənməsi NATO qarşısındakı öhdəliklərlə ziddiyyət təşkil etməməlidir.
Bildirilir ki, nazir Türkiyənin Rusiya-Ukrayna müharibəsinin sona çatdırılması istiqamətində vasitəçilik etməyə hazır olduğunu, lakin yaxın perspektivdə sülh danışıqlarının başlanacağına dair nikbin olmadığını deyib.
Qeyd olunur ki, Hakan Fidan ABŞ və İran arasında əldə olunan anlaşma memorandumu ilə bağlı da danışaraq, tərəflərin siyasi iradə nümayiş etdirdiyini, lakin nüvə proqramı və sanksiyalar kimi məsələlərin gələcək danışıqların əsas mövzuları olaraq qaldığını bildirib.
