NATO hava məkanının pozulması hallarında fəaliyyət planlarını vahid formaya salacaq.
"Operativ Məlumat Mərkəzi-OMM" xəbər veriri ki, bununla bağlı xarici KİV məlumat yayıb.
Bildirilib ki, NATO-ya üzv dövlətlər bununla bağlı işə başlayıblar.
“Buradakı məqsəd pilotun atəş açmaq qərarı verərkən özünü daha inamlı hiss etməsidir. Elə hallar olub ki, pilot drona atəş açmağa hazır idi, lakin həmin döyüş aparıldığı ölkənin protokolu bunu ya qadağan edirdi, ya da aydın deyildi”, – qəzetin diplomatik mənbəsi bildirib.
Planlaşdırılır ki, fəaliyyət planlarının unifikasiyası məsələsi gələn həftə Brüsseldə keçiriləcək NATO müdafiə nazirlərinin görüşündə müzakirə olunsun.
Bundan əvvəl Avropa Parlamenti (AP) Rusiya təyyarələrinin Avropa İttifaqının hava məkanına daxil olduğu təqdirdə vurulmasını təşviq edən qətnamə qəbul etmişdi. Sənəd Aİ və onun üzv dövlətlərini hava məkanlarının pozulmasına qarşı koordinasiyalı, vahid və mütənasib tədbirlər görməyə çağırır.
