Mərmərə dənizində heyəti ilə birlikdə batan türk yük gəmisi axtarılır

Türkiyə bayraqlı yük gəmisi Mərmərə dənizində batıb.

"Operativ Məlumat Mərkəzi-OMM" xəbər verir ki, bu barədə “TRT Haber” telekanalı məlumat yayıb.

Hadisə İmralı adası yaxınlığında baş verib. Nəqliyyat Nazirliyi də hadisəni təsdiqləyib. Onlar qeyd ediblər ki, gəmidən SOS siqnalı saat 06.32-də gəlib, 07.12-də isə gəmi ilə əlaqə kəsilib.

Gəmidə altı dənizçi olub. İlkin məlumatlara görə, onların hamısı Türkiyə vətəndaşıdır.

Qrupların axtarış-xilasetmə işləri davam edir. Bursa valisi Mahmud Dəmirtaş hadisədən sonra Sahil Polis Baş İdarəsindən iki qrup və Balıkəsirdə Bandırma rayonundan bir qrup bölgəyə göndərildiyini açıqlayıb.

Hadisə yerinə 3 sahil mühafizə gəmisi və bir helikopter göndərilib. Bununla belə, qubernator bildirib ki, pis hava şəraiti səbəbindən dənizçiləri axtarmaq çətin olub.