Kanada, Vaşinqtonun Kanada mallarına 25% rüsum tətbiq etməsinə cavab olaraq, fevralın 4-dən etibarən bir sıra ABŞ məhsullarına tarifləri artıracaq.
"Operativ Məlumat Mərkəzi-OMM" xəbər verir ki, bu barədə Kanada hökuməti bəyanat yayıb.
Ət, süd məhsulları, meyvə-tərəvəz, portağal suyu, şərab, pivə, fermentləşdirilmiş içkilər və qəhvə də daxil olmaqla, 155 milyard dollar dəyərində Amerika məhsullarına 25% rüsum tətbiq ediləcək.
Bundan başqa, minik avtomobilləri, yük maşınları və avtobuslar, elektrik avtomobilləri, motosikletlər, dəmir və alüminium məmulatları, kosmetika, kağız, ayaqqabı, geyim, bomba, mina, raket, qumbara və bir sıra digər mallara rüsum tətbiq olunacaq.
"ABŞ Kanada məhsullarına əsassız tariflər tətbiq etməyə davam edərsə, hökumət əlavə tədbirləri, o cümlədən qeyri-tarif variantlarını nəzərdən keçirdiyi üçün bütün variantlar masada qalır".
Fevralın 1-də ABŞ Kanada idxalına 25%, enerji məhsullarına isə 10% rüsum tətbiq edəcəyini açıqlamışdı.
ABŞ tarifləri fevralın 4-dən qüvvəyə minəcək.
Bundan başqa, ABŞ prezidenti Donald Tramp Meksikadan idxal edilən mallara 25%, Çindən idxal olunan mallara isə 10% rüsum tətbiq ediləcəyini açıqlayıb.
