İtaliya Ukraynanın Avropa Birliyinə daxil olmasını dəstəkləyəcək

Ukraynanın Avropa İttifaqına (Aİ) daxil olması ilə bağlı danışıqlar yaxın vaxtlarda başlayacaq və İtaliya bu qərarı dəstəkləyəcək.

"Operativ Məlumat Mərkəzi-OMM" xəbər verir ki, bu sözləri İtaliyanın “Repubblica” qəzetinə danışan prezident Sercio Mattarella deyib.

"Ümid edirəm ki, bu məsələ ilə bağlı danışıqlar yaxın vaxtlarda başlayacaq", - Mattarella Ukrayna prezidenti Vladimir Zelenski ilə görüşündə deyib.

İtaliya lideri NATO-nun son sammitinin yekun bəyanatına istinad edib. Mattarella Ukraynanın təhlükəsizliyinin Avropa təhlükəsizliyinə uyğun olduğunu bir daha vurğulayıb. İtaliya prezidentinin sözlərinə görə, onun ölkəsinin Ukrayna ilə möhkəm dostluq əlaqələri var.

Macarıstanın baş naziri Viktor Orban bundan əvvəl Ukraynanın Avropa Birliyinə üzv olmayacağını bildirib. Orbanın sözlərinə görə, rəsmi Brüssel Macarıstanın bu məsələ ilə bağlı mövqeyini diqqətdən kənarda qoya bilməyəcək.