Afət Ziyadqızı
İordaniya Kralı II Abdallah ABŞ-nin dövlət katibi Antoni Blinkeni Əmmanda qəbul edib, onlar Yaxın Şərqdəki vəziyyəti müzakirə ediblər.
"Operativ Məlumat Mərkəzi-OMM" xəbər verir ki, bu barədə İordaniya KİV-i məlumat yayıb.
Kral qeyd edib ki, Qəzza zolağındakı humanitar böhrana son qoymaq lazımdır. O, ABŞ-nin Qəzza zolağında atəşkəsə nail olmaq, mülki əhalini qorumaq, humanitar və tibbi yardımın çatdırılmasını təmin etmək səylərini yüksək qiymətləndirib.
Bununla yanaşı, İordaniya ilə ABŞ arasında strateji tərəfdaşlıq və müxtəlif sahələrdə əməkdaşlığın artırılması müzakirə edilib.
Qeyd edək ki, Blinken İordaniyadan əvvəl Türkiyəyə səfər edib və Prezident Rəcəb Tayyib Ərdoğanla danışıqlar aparıb. Təxminən 1,5 saat davam edən görüşdə Qəzzadakı vəziyyət, İsveçin NATO-ya üzvlük prosesi və F-16-ların tədarükü müzakirə edilib.
