Afət Ziyadqızı
ABŞ-nin keçmiş dövlət katibi Antoni Blinken Avropa ölkələrinin Ukrayna məsələsində “vəziyyətdən sui-istifadə etməsi” ilə bağlı iddiaların həqiqəti əks etdirmədiyini bildirib.
“Operativ Məlumat Mərkəzi-OMM” xəbər verir ki, o, bu barədə C-Span kanalına açıqlamasında danışıb.
Blinken qeyd edib ki, ABŞ-nin Ukraynaya ayırdığı hər bir dollara qarşılıq olaraq Avropa ölkələri və digər tərəfdaşlar əlavə olaraq bir yarım dollar dəstək veriblər.
“Ukraynaya yatırdığımız hər dollara avropalılar və digərləri bir yarım dollar əlavə ediblər. Beləliklə, onların sadəcə Ukrayna ətrafındakı vəziyyətdən istifadə etdikləri fikri doğru deyil”, – deyə o vurğulayıb.
Keçmiş dövlət katibi həmçinin bildirib ki, Ukraynaya dəstək üçün ayrılan Amerika vəsaitlərinin böyük hissəsi ABŞ daxilində xərclənib.
Onun sözlərinə görə, bu vəsait əsasən Kiyev üçün yeni silah sistemlərinin alınmasına və ya Ukraynaya göndərilən silahların əvəzlənməsinə yönəldilib.
