Gürcüstan silahlı münaqişənin başa çatmasından sonra Ukraynadan qeyri-dost addımlara görə izahat tələb edəcək.
"Operativ Məlumat Mərkəzi-OMM" xəbər verir ki, bu barədə Gürcüstan parlamentinin spikeri Şalva Papuaşvili TASS agentliyinə açıqlamasında bildirib.
Papuaşvili qeyd edib ki, Ukraynanın Gürcüstana qarşı atdığı bəzi addımlar dostluq münasibətlərinə uyğun gəlmir və bu məsələlər münaqişə bitdikdən sonra ciddi şəkildə gündəmə gətiriləcək.
Sentyabrın 16-da Gürcüstanın baş naziri İrakli Kobaxidze də bu məsələ ilə bağlı çıxış edərək bildirib ki, ölkəsi Ukrayna ilə birtərəfli dostluq rejimini davam etdirir. O vurğulayıb ki, bütün təxribatlara baxmayaraq, Gürcüstan münasibətləri gərginləşdirməməyə çalışır.
Baş nazir həmçinin Gürcüstanda ələ keçirilən partlayıcı maddələrlə bağlı aparılan təhqiqatın nəticələrinə toxunaraq, həmin materialların ölkəyə Ukrayna xüsusi xidmət orqanlarının sifarişi ilə gətirildiyinin müəyyən edildiyini bildirib. Kobaxidze bu faktı “təəssüf doğuran” adlandırıb və bu kimi halların iki ölkə arasındakı münasibətlərə mənfi təsir etdiyini qeyd edib.
