Afət Ziyadqızı
Gürcüstanın Baş naziri İrakli Kobaxidze Bakı-Tbilisi-Qars (BTQ) dəmir yolu xəttinin rəsmi açılış mərasimində çıxış edərək, layihənin regionun logistika imkanları üçün daşıdığı strateji önəmdən bəhs edib. O, bu marşrutun Avropa ilə Asiyanı birləşdirən mühüm qlobal ticarət şəbəkəsi olduğunu qeyd edib.
Baş nazirin sözlərinə görə, xəttin tam istismara verilməsi ilə illik yükötürmə qabiliyyəti 5 milyon tona çatdırılacaq. Bu göstərici Orta Dəhlizin rəqabət qabiliyyətini gücləndirməklə yanaşı, regionun tranzit imkanlarını da əhəmiyyətli dərəcədə genişləndirəcək. Kobaxidze BTQ-ni Azərbaycan, Gürcüstan və Türkiyə arasında strateji tərəfdaşlığın bariz nümunəsi kimi qiymətləndirib.
Layihənin texniki göstəriciləri barədə məlumat verən hökumət başçısı bildirib ki, marşrutun Marabdidən Türkiyə sərhədinə qədər uzanan 180 kilometrlik hissəsində genişmiqyaslı işlər görülüb:
- 153 kilometrlik hissə yenidən qurulub.
- 27 kilometrlik hissə isə tamamilə yeni standartlara uyğun inşa edilib.
Məlumata əsasən, 2017-ci ildən sınaq rejimində fəaliyyət göstərən dəmir yolu xətti ilə indiyədək təxminən 1,8 milyon ton yük və 90 minə yaxın konteyner daşınıb. İrakli Kobaxidze qlobal ticarət marşrutlarının dəyişdiyi bir dövrdə BTQ-nin strateji əhəmiyyətinin daha da artdığını vurğulayıb.
