Humanitar yardım daşıyan ən azı 26 yük maşını cümə günü “Rəfah” nəzarət-buraxılış məntəqəsi vasitəsilə Qəzza zolağına daxil olub.
"Operativ Məlumat Mərkəzi-OMM" xəbər verir ki, bu barədə İsrailin Fələstin torpaqlarında hökumət fəaliyyətləri üzrə koordinatorunun (COGAT) ofisi məlumat yayıb.
“Humanitar yardım daşıyan 26 yük maşını yoxlanılaraq “Rəfah” keçid məntəqəsi vasitəsilə Qəzzaya göndərilib”, - ofisin “X” sosial şəbəkəsindəki səhifəsində yayımlanan məlumatda deyilir.
Anklav ərazisinə 12 yük maşını ərzaq, 10-u tibbi avadanlıq, 3-ü su, 1-i isə müvəqqəti məskunlaşma üçün avadanlıq aparıb.
Xatırladaq ki, İsrail ərazisinə HƏMAS tərəfindən raket hücumları oktyabrın 7-də Qəzza zolağından başlayıb. İsrail ordusu cavab olaraq “müharibə hazırlığı”nı elan edib. Oktyabrın 8-də İsrail rəsmi olaraq ölkənin “müharibə vəziyyətinə” daxil olduğunu bəyan edib. Əks-əməliyyat “Dəmir qılınclar” adlandırılıb.
