Samir Rafiq oğlu Nuriyev

Samir Rafiq oğlu Nuriyev 9 mart 1975-ci ildə Bakıda doğulub. 1981–1991-ci illərdə Bakıdakı 225 saylı orta məktəbdə oxuyub.

1996–2003-cü illərdə bir sıra özəl şirkətlərdə işləyib. 2000–2001-ci illərdə BMT İnkişaf Proqramının Azərbaycandakı Nümayəndəliyində “Azərbaycanda kiçik və orta özəl müəssisələrin inkişafına yardım” layihəsinin məsləhətçisi olub. 2006–2009-cu illərdə İqtisadi İnkişaf Nazirliyində əvvəlcə Sahibkarlığın İnkişafı Departamentinin direktor müavini və direktoru, sonra nazirliyin Sahibkarlığın inkişafı siyasəti şöbəsinin müdiri vəzifələrində çalışıb.

Prezident sərəncamları ilə 2009–2013-cü illərdə Nazirlər Kabineti yanında “İçərişəhər” Dövlət Tarix-Memarlıq Qoruğu İdarəsi rəisinin müavini, 2013–2016-cı illərdə həmin idarənin rəisi olub. 2016–2018-ci illərdə Mənzil İnşaatı Dövlət Agentliyinə rəhbərlik edib, 2018-ci ildən 2019-cu ilin noyabrınadək Dövlət Şəhərsalma və Arxitektura Komitəsinin sədri işləyib. 2019-cu il 1 noyabr tarixli Prezident Sərəncamı ilə Azərbaycan Respublikası Prezidentinin Administrasiyasının rəhbəri təyin edilib.

Azərbaycan, rus, ingilis və türk dillərini bilir. Evlidir, üç övladı var.

• 1981–1991 — Bakı şəhəri, 225 saylı orta məktəb
• 1996 — Azərbaycan Texniki Universiteti, Mühəndis biznesi və menecment fakültəsi, mühəndis-iqtisadçı ixtisası (fərqlənmə diplomu)
• 2003–2005 — Dyuk Universiteti (ABŞ), beynəlxalq inkişaf siyasəti ixtisası, magistr