Ukrayna müstəqilliyinin 35-ci ildönümünü davam edən müharibə şəraitində qeyd edir.
“Operativ Məlumat Mərkəzi – OMM” xəbər verir ki, Ukrayna Prezidenti Volodimir Zelenski Kiyevdə keçirilən tədbirlərdə çıxışı zamanı ölkəsinin sülh istədiyini, lakin Rusiyanın tələbləri qarşısında geri çəkilməyəcəyini bildirib.
Zelenski tərəfdaş ölkələri Rusiyaya qarşı təzyiqləri artırmağa və Moskvanı danışıqlar masasına oturmağa məcbur etməyə çağırıb.
Müstəqillik Günü ilə bağlı tədbirlərdə Kiyevə səfər edən Böyük Britaniyanın Baş naziri Endi Börnem və digər Qərb liderləri Ukraynaya hərbi dəstəyin davam etdiriləcəyini açıqlayıblar.
Böyük Britaniya və Ukrayna arasında müdafiə sahəsində süni intellekt texnologiyalarının inkişafı ilə bağlı yeni tərəfdaşlıq sazişi də imzalanıb. Bildirilir ki, platforma “DELTA” döyüş sistemindən əldə edilən milyonlarla döyüş meydanı görüntüsünü təhlil edərək hədəflərin real vaxt rejimində müəyyənləşdirilməsinə imkan verəcək.
Avropa Komissiyası isə Ukraynanın hava hücumundan müdafiə imkanlarının gücləndirilməsi üçün 6,1 milyard avroluq yeni maliyyə paketi ayırıb. Komissiyanın sədri Ursula fon der Lyayen Avropanın Ukraynaya lazım olduğu müddət ərzində dəstək göstərəcəyini bildirib.
Bu arada, cəbhə xəttində döyüşlər davam edir. Rusiya Müdafiə Nazirliyi Odessadakı limanda hərbi yük daşıdığını iddia etdiyi yük gəmisinə zərbə endirildiyini açıqlayıb. Ukrayna tərəfi isə Rostov vilayətində raket yanacağı və sursat istehsal edən hərbi zavoda zərbə endirdiyini bildirib.
Rusiya həmçinin Donetsk, Zaporojye və Sumı vilayətlərində üç yaşayış məntəqəsinə nəzarəti ələ keçirdiyini iddia edib.
Qeyd edək ki, tərəflər arasında Belarusun vasitəçiliyi ilə 10-10 formatında növbəti əsir mübadiləsi də baş tutub. Danışıqlar prosesinin davam etməsinə baxmayaraq, qarşılıqlı hücumlar və cəbhədəki toqquşmalar səngimir.
