Afət Ziyadqızı
Ukrayna Prezidenti Volodimir Zelenski və İsrailin Baş naziri Binyamin Netanyahu ABŞ Prezidenti Donald Trampla Ağ Evdə keçirilməsi gözlənilən görüşlərdə onun dəstəyini qazanmağa çalışacaqlar.
“Operativ Məlumat Mərkəzi-OMM” xəbər verir ki, bu barədə "ABC News" telekanalı məlumat yayıb.
Bildirilib ki, telekanalın təhlilinə əsasən, hər iki lider davam edən münaqişələr fonunda öz strateji planlarını ABŞ-nin yeni administrasiyasına təqdim etməyi hədəfləyir. Qeyd edilib ki, ABŞ-nin İran siyasəti və Rusiya-Ukrayna müharibəsinə yanaşmasının hələ də qeyri-müəyyən qalması Kiyev və Təl-Əviv üçün bu görüşləri xüsusi əhəmiyyətli edir.
Qeyd olunub ki, "ABC News"un mənbələrinin məlumatına görə, ABŞ-nin milli təhlükəsizlik rəsmiləri İranla mümkün münaqişənin Pentaqonun silah ehtiyatlarına təsirini müzakirə edirlər. Xüsusilə, Ukrayna üçün mühüm əhəmiyyət daşıyan "Patriot" hava hücumundan müdafiə sistemlərinin ehtiyatlarının azalması narahatlıq doğurur. Mənbələr həmçinin Donald Trampın Volodimir Zelenskiyə münasibətində beynəlxalq sammitlər çərçivəsində keçirilən son görüşlərdən sonra müsbət dəyişiklik müşahidə olunduğunu bildiriblər.
