Ukrayna Prezidenti Volodimir Zelenski Rusiyanın Zaporojye şəhərinə endirdiyi zərbələr zamanı Şimali Koreya istehsalı olan ballistik raketlərdən istifadə etdiyini açıqlayıb.
“Operativ Məlumat Mərkəzi – OMM” xəbər verir ki, Zelenski bu barədə video müraciətində danışıb.
Məlumata görə, Zaporojye vilayətinin rəhbəri İvan Fedorov hücumlar nəticəsində azı 6 nəfərin öldüyünü, 19 nəfərin isə yaralandığını bildirib. Zərbələr nəticəsində sənaye obyektləri, mülki infrastruktur və yaşayış binalarına ciddi ziyan dəyib.
Zelenski bildirib ki, Rusiya artıq Şimali Koreyadan hərbi dəstək almadan müharibəni davam etdirməkdə çətinlik çəkir.
Ukrayna Prezidenti Şimali Koreya raketlərinin və hərbçilərinin Avropadakı müharibəyə cəlb olunmasının qlobal təhlükəsizlik üçün riskləri artırdığını vurğulayıb. O, daha əvvəl təxminən 50 min Şimali Koreya hərbçisinin Rusiya tərəfində döyüşmək üçün göndərildiyini iddia etmişdi.
Bu arada, Ukrayna ordusunun Rusiyanın daxilindəki logistik mərkəzlərə və neft-kimya müəssisələrinə zərbələri davam etdirdiyi bildirilir.
Məlumata görə, Rusiyanın ən böyük onlayn pərakəndə satış şirkətlərindən biri olan “Wildberries”in Voronej vilayətindəki anbarlarında partlayışlar və yanğınlar baş verib. Şirkət rəsmiləri əməkdaşların təxliyə edildiyini açıqlayıblar.
Tatarıstanda yerləşən neft emalı zavoduna hücum zamanı isə azı 13 nəfərin öldüyü, onlarla şəxsin yaralandığı bildirilir. Ölənlər arasında Özbəkistan vətəndaşlarının da olduğu qeyd edilir.
Ukrayna rəsmiləri bu cür zərbələrin Rusiyanın hərbi logistikasını zəiflətmək və Moskvanı sülh danışıqlarına məcbur etmək məqsədi daşıdığını bildirirlər.
Digər tərəfdən, gecə saatlarında Kiyev və Ukraynanın digər bölgələrində hava həyəcanı siqnalları verilib.
Ukrayna Hava Hücumundan Müdafiə Qüvvələrinin məlumatına görə, Rusiya 120-dən çox pilotsuz uçuş aparatı (PUA) və müxtəlif tipli raketlərlə hücum edib.
Xerson və Xarkov vilayətlərində elektrik ötürücü xətlərinə dəyən ziyan nəticəsində enerji təchizatında fasilələr yaranıb. Sumı şəhərində isə PUA hücumu nəticəsində iki qadının yaralandığı bildirilib.
Rəsmi Kiyev hava hücumundan müdafiə sistemlərinin effektivliyinin qorunması məqsədilə hərbi məlumatların paylaşılmasında ehtiyatlı davranmağa çağırıb.
