Zelenski 5 minlik briqada istədi: Cəbhəyə Qərb hərbçiləri gəlir?

“Zelenski müttəfiqləri cəbhə xəttinə yaxın hərbi kontingent yerləşdirməyə çağırıb”.

“Operativ Məlumat Mərkəzi-OMM” xəbər verir ki, bunu Ukrayna Prezidenti Vladimir Zelenski "BBC News"a müsahibəsində bildirib.

Zelenskinin sözlərinə görə, Ukraynanın müttəfiqləri gələcəkdə hərbi kontingentlərini ölkə ərazisində, mümkün qədər Rusiya ilə cəbhə xəttinə yaxın yerləşdirməlidirlər.

“Fransa və Britaniya hər biri bir briqada verə bilər. Biz başa düşürük ki, bu, 5000 nəfərə qədər şəxsi heyət deməkdir. Həmçinin, Ukraynanı öz kontingenti ilə gücləndirməyə hazır olan bir neçə başqa ölkədən də siqnallar var. Biz cəbhə xəttinə daha yaxın bir kontingent görmək istərdik”, – deyə o qeyd edib.

Prezident əlavə edib ki, Polşa hələlik Ukraynaya qoşun göndərdiyini təsdiqləməyib. Bununla belə, Kiyevin, məsələn, Lvovda xarici hərbçilərin yerləşdirilməsi variantını yetərli hesab etmədiyini bildirib.

Onun fikrincə, Varşava daha çox qırıcı təyyarələr və hava hücumundan müdafiə sistemləri üçün logistika dəstəyi göstərə, eləcə də düşmən hava hədəflərinin qonşu dövlətlərin ərazisindən vurulmasına şərait yarada bilər.

Zelenski etiraf edib ki, “heç kim ön cəbhədə olmaq istəmir”. Lakin o vurğulayıb ki, ukraynalılar cəbhə xəttində “tərəfdaşları” görmək istəyirlər.