Afət Ziyadqızı
Ukrayna Prezidenti Vladimir Zelenski Belarus Prezidenti Aleksandr Lukaşenkonun iki oğluna qarşı 10 illik sanksiyalar tətbiq edib.
"Operativ Məlumat Mərkəzi-OMM"xəbər verir ki, bu barədə Armenpress məlumat yayıb.
Məlumata görə, Ukrayna prezidentinin rəsmi saytında dərc olunan fərmanla sanksiyalar Viktor və Dmitri Lukaşenkoya şamil edilib. Eyni zamanda Belarus Silahlı Qüvvələrinin Baş Qərargah rəisi Pavel Muraveyko da məhdudiyyətlər siyahısına daxil edilib.
Bildirilib ki, Ukraynanın sanksiya siyahısına ümumilikdə 16 Belarus vətəndaşı daxil edilib. Onlara qarşı 10 il müddətinə aktivlərin dondurulması, iqtisadi və maliyyə əməliyyatlarının məhdudlaşdırılması, rəsmi səfərlərin ləğvi, kommersiya fəaliyyətinə qadağa və dövlət mükafatlarının ləğvi daxil olmaqla 16 müxtəlif məhdudlaşdırıcı tədbir tətbiq olunub.
Qeyd olunub ki, Belarus parlamentinin üzvü Oleq Qaydukeviç bu addımı tənqid edərək, Zelenskinin Lukaşenkonun oğullarına qarşı sanksiyalar tətbiq etməsini “aşağı addım” kimi qiymətləndirib.
