OMM Redaksiyası
“Yuventus”un cinah hücumçusu Fransişku Konseysau Avropa Liqasının ümumi mərhələsinin ikinci turunda “Selta” ilə keçirilən matçda əvəzlənməsinə etiraz edib. Turin təmsilçisinin 2:1 hesablı qələbəsi ilə başa çatan görüşdə hadisə 64-cü dəqiqədə yaşanıb.
A Bola-nın məlumatına görə, baş məşqçi Luçano Spaletti həmin vaxt portuqaliyalı futbolçunu Nikо Qonsaleslə əvəzləyib. Meydanı tərk edən Konseysau ehtiyat oyunçular skamyasına bir neçə dəfə yumruqla zərbə endirib.
Bundan sonra cinah hücumçusu məşqçilər korpusunun nümayəndələrindən biri ilə mübahisə edib və paltardəyişmə otağına yollanıb. Nümayəndənin kimliyi açıqlanmayıb.
Nəşrin yazdığına görə, bu, Konseysaunun əvəzlənməsinə emosional reaksiya verdiyi ilk hadisə deyil. Spaletti daha əvvəl “Kalyari” ilə 1:1 hesabı ilə başa çatan oyunun fasiləsində də onu əvəz etmişdi.
