OMM Redaksiyası
“Yuventus”un baş məşqçisi Lusiano Spalletti Avropa Liqasının əsas mərhələsinin II turunda “Selta” ilə keçirilən oyundan sonra Fransişku Konseysaunun davranışına münasibət bildirib. Portuqaliyalı cinah oyunçusu əvəzləndikdən sonra ehtiyat oyunçular skamyasına bir neçə zərbə endirib və məşqçilər korpusunun nümayəndələrindən biri ilə mübahisə edib.
Viqoda keçirilən qarşılaşma “Yuventus”un 2:1 hesablı qələbəsi ilə başa çatıb. 18-ci dəqiqədə Alvares hesabı açıb, Vulteymade 59-cu dəqiqədə tarazlığı bərpa edib. Kolo Muani 90+2-ci dəqiqədə Turin klubuna qələbə qazandıran qolu vurub.
“Qəzəbini özünə yönəltməsi onun üçün daha faydalı olardı. Deyəcəyi söz varsa, iradlarını özünə — oyununa ünvanlasın. Əgər belə münasibət göstəribsə, bunu bizə izah etsin, məsələni aydınlaşdırmağa çalışaq”, – Spallettinin sözlərini Football Italia yayıb.
Konseysau “Yuventus”un start heyətində meydana çıxıb və 64 dəqiqə oynayıb. O, məhsuldar göstərici ilə yadda qalmayıb. Spalletti isə futbolçunun 70-ci dəqiqədə əvəzləndiyini deyib və komandasının bir neçə gün sonra növbəti matça çıxacağını xatırladıb.
23 yaşlı portuqaliyalı bu mövsüm klub səviyyəsində bütün turnirlərdə səkkiz oyunda iştirak edib, bir qol vurub və bir məhsuldar ötürmə verib.
