Afət Ziyadqızı
Rusiya Prezidenti Vladimir Putin Ermənistanın ikinci prezidenti Robert Köçəryanı 72 illik yubileyi münasibətilə təbrik edib.
“Operativ Məlumat Mərkəzi – OMM” xəbər verir ki, Kremlin məlumatına görə, Putin təbrik teleqramında Robert Köçəryanın Rusiya ilə Ermənistan arasında dostluq və müttəfiqlik əlaqələrinin inkişafındakı şəxsi rolunu xüsusi vurğulayıb.
Rusiya lideri məktubunda Robert Köçəryana möhkəm cansağlığı və ruh yüksəkliyi arzulayıb.
Putin, həmçinin, keçmiş prezidentə və onun ailə üzvlərinə hazırda üzləşdikləri çətinliklər qarşısında dözümlü olmağı diləyib.
“Rusiyada sizin ölkələrimiz arasında dostluq və müttəfiqlik əlaqələrinin inkişafına verdiyiniz şəxsi töhfə unudulmur”, - deyə təbrikdə bildirilib.
Xatırladaq ki, avqustun 25-də Ermənistan hüquq-mühafizə orqanları Robert Köçəryanın, onun oğlu Levonun evlərində, habelə ailəyə məxsus şirkətlərdə axtarışlar aparıb.
Bu əməliyyatlardan sonra Robert Köçəryan və onun böyük oğlu Sedrak həbs ediliblər.
Eks-prezidentə qarşı qanunsuz yolla əmlak əldə etmə ilə bağlı ittihamlar irəli sürülüb.
İstintaqın versiyasına görə, Köçəryan dövlət başçısı olduğu dövrdə vəzifə səlahiyyətlərindən sui-istifadə edərək, digər şəxslərlə cinayət əlbirliyi qurub və ictimai-iqtisadi əhəmiyyətli bir sıra obyektləri bazar qiymətindən aşağı qiymətə ələ keçirib.
