Afət Ziyadqızı
Ukrayna Prezidenti Volodimir Zelenski ölkənin müxtəlif bölgələrinə gecə saatlarında həyata keçirilən hava hücumlarını şərh edib.
“Operativ Məlumat Mərkəzi-OMM” xəbər verir ki, Zelenskinin sözlərinə görə, Rusiya ordusu Ukraynaya ballistik raketlər və pilotsuz uçuş aparatları ilə zərbələr endirib. Hücumların əsas hədəfi paytaxt Kiyev və onun yaxınlığındakı yaşayış məntəqələri olub.
Zərbələr nəticəsində su və elektrik təchizatında fasilələr yaranıb, yaşayış evlərinə ziyan dəyib. Odessa, Nikolayev, Kirovoqrad, Rovno və Jitomir vilayətləri də hücuma məruz qalıb.
“Mövcud məlumatlara görə, bu hücumlar nəticəsində ölkə üzrə 14 nəfər yaralanıb. Təəssüf ki, onların arasında bir uşağın da olduğu 5 nəfər həyatını itirib”, – Zelenski bildirib.
Ukrayna Silahlı Qüvvələrinin Hərbi Hava Qüvvələri Komandanlığının yaydığı yazılı açıqlamada Rusiyanın ölkəyə göndərdiyi 5 ballistik raket və 155 pilotsuz uçuş aparatının zərərsizləşdirildiyi bildirilib.
