Türkiyənin xarici işlər naziri Hakan Fidan milli müdafiə naziri Yaşar Gülər və Milli Kəşfiyyat Təşkilatının rəhbəri İbrahim Kalınla birlikdə Suriyaya səfər ediblər.
"Operativ Məlumat Mərkəzi-OMM" xəbər verir ki, bununla bağlı "TRT Haber" məlumat yayıb.
Bildiirlib ki, onlar Suriyanın paytaxtı Dəməşqdə Suriya prezidenti Əhməd əl-Şaraa və suriyalı rəsmilərlə görüşəcək.
Görüşlərdə Türkiyə–Suriya münasibətlərinin son bir ildəki gedişatının hərtərəfli qiymətləndirilməsi nəzərdə tutulur.
Türkiyə və Suriyanın ortaq maraqları, eləcə də Suriyanın son dövrdə DEAŞ-ın yenidən fəallaşmasının qarşısının alınmasına yönəlmiş əməkdaşlıq da müzakirə ediləcək.
Görüşlərin əsas diqqət mərkəzində təhlükəsizlik məsələləri olmaqla yanaşı, Suriyanın yenidən qurulması üçün ikitərəfli səviyyədə həyata keçirilən layihələrin nəzərdən keçirilməsi və Suriya hökumətinin institusional potensialının gücləndirilməsinə dəstək məqsədilə görülən işlərin qiymətləndirilməsi də planlaşdırılır.
Türkiyənin Dəməşqdəki səfiri vəzifəsinə təyin edilən xarici işlər nazirinin müavini Nuh Yılmazın da görüşlərdə iştirak etməsi nəzərdə tutulur.
