ABŞ Prezidenti Donald Tramp Ukrayna Prezidenti Volodimir Zelenski ilə telefon danışığında Rusiya ilə müharibəni mümkün qədər tez bitirmək istədiyini bildirib.
“Operativ Məlumat Mərkəzi-OMM” xəbər verir ki, bu barədə xarici KİV Ukrayna rəsmisinə və söhbətlə tanış olan iki digər mənbəyə istinadən məlumat yayıb.
Mənbələrin sözlərinə görə, Tramp və Zelenski arasında telefon danışığı çox səmimi və müsbət atmosferdə keçib. Zelenski göstərilən dəstəyə görə Trampa təşəkkür edib və yalnız onun Vladimir Putini müharibəyə son qoymağa inandıra biləcəyini vurğulayıb.
Mənbələrdən biri bildirib ki, Zelenski müharibənin bu il başa çatacağına ümid etdiyini deyib. Tramp isə cavabında münaqişənin həddindən artıq uzandığını və onun bir ay ərzində bitməsini istədiyini qeyd edib.
Reutersin məlumatına görə, telefon danışığından sonra Zelenski Rusiya və ABŞ ilə üçtərəfli danışıqların gələn ayın əvvəlində keçiriləcəyini açıqlayıb.
Zelenski X sosial şəbəkəsində yazıb: “Biz bu görüşün danışıqları liderlik səviyyəsinə keçirmək üçün fürsət yaratmasını gözləyirik. Prezident Tramp bu addımlar ardıcıllığını dəstəkləyir. Bu, bütün mürəkkəb və həssas məsələləri həll etməyin və nəhayət müharibəyə son qoymağın yeganə yoludur”.
