“Tottenhem” Upamekano üçün hərəkətə keçdi

“Tottenhem Hotspur” Almaniya nəhəngi “Bayern Münxen”in mərkəz müdafiəçisi Dayot Upamekanonun meneceri ilə ilkin xarakterli danışıqlar aparıb.

"Operativ Məlumat Mərkəzi-OMM" xarici KİV-ə istinadən xəbər verir ki, London klubu fransız futbolçunun mövcud müqavilə vəziyyətini öyrənib və mümkün transfer şərtləri ətrafında araşdırma aparıb.

Bildirilir ki, “Bayern Münxen” Upamekanoya son müqavilə yenilənməsi təklifini qəbul etməsi üçün bir neçə həftə vaxt verib. Paralel olaraq, Avropanın bir neçə aparıcı klubu da futbolçunun nümayəndələri ilə təmas qurub.

“Sky Germany” nəşrinin jurnalisti Florian Plettenberqin məlumatına görə, 25 yaşlı müdafiəçi hələlik yeni müqaviləyə imza atmayıb. Səbəb isə onun “Liverpul” və ya “Real Madrid”dən gələcək mümkün təklifləri gözləməsidir.

Qeyd edək ki, Upamekano son illərdə “Bayern”in əsas müdafiəçilərindən biri hesab olunur və onun qərarı yay transfer pəncərəsinin ən çox müzakirə olunan mövzularından birinə çevrilə bilər.