Bu gün Frank Şvabenin özünün siyasi fəaliyyətini tamamilə anti-azərbaycan ritorikaya həsr etdiyini çox açıq-aydın görürük. Bütövlükdə AŞPA-da təmsil olunanların bir çoxu reallıq hissini itirmiş, obyektivlikdən uzaq şəxslər kimi göz önünə gəlirlər.

İnsan haqlarından, demokratiyadan dəm vuran Frank Şvabe və onun timsalında AŞPA-dakı ermənipərəst dairələr Ermənistanda 52 günlük aclıq aksiyasından sonra həyatını itirən siyasi məhbus Mqer Yeqiazaryanın başına gətirilənlərə göz yumur.

Bu sözləri  "Operativ Məlumat Mərkəzi-OMM"-ə açıqlamasında politoloq Tural İsmayılov bildirib.

O, qeyd edib ki bu gün Ermənistanda müxalifətə qarşı həyata keçirilən basqıları görmürlər. Hələ də Nikol Paşinyana qarşı əsas müxalif qüvvələrdən biri hesab edilən Armen Aşotyan həbsdədir. Həbsə gətirilərkən məruz qaldığı siyasi təzyiqlər üzündən məhkəmə zalında ölən Armen Qriqoryanı heç kim unutmayıb və belə olan təqdirdə AŞPA-nın Ermənistanda baş verən bu hadisələri görməzdən gəlməsi və Frank Şvabenin Cənubi Qafqaz regionunda ancaq Azərbaycana “fokuslanması” Şvabe və Şvabe timsalındakıların nə qədər rəzil, qeyri-səmimi olduqlarını növbəti dəfə ortaya qoymuş olur.

Ekspert vurğulayıb ki, Frank Şvabe və AŞPA-nın içərisində erməni lobbisi ilə əlaqəli olan şəxslər kifayət qədər çoxdur və bu adamlar AŞPA-nın və bütövlükdə Qərb təsisatlarının, Qərb siyasi institutlarının nüfuzunu daha da zədələməklə məşğuldur. Bunlar əlbəttə ki, heç bir halda Qərb siyasi institutlarına baş ucalığı gətirmir.

“Frank Şvabenin fəaliyyətinin artıq anti-azərbaycan ritorikaya söykədiyini görürük. O, sanki özünün ağası olan siyasi dairələrə mesaj verməyə çalışır və hər gün Azərbaycan əleyhinə hansısa qəribə addımlar atmaqla, özünü bir növ anti-azərbaycan ritorikasının mərkəzində göstərməyə çalışır", - deyə T.İsmayılov bildirib.

Hesab edirəm ki, hər halda Şvabe kimi ölkələr arasında fərq qoyan, Azərbaycanla Ermənistana yanaşmalarda obyektivliyə söykənməyən adamların mövcud olması, təəssüf ki, bütün dünya siyasi sisteminin böyük utanclarından biridir.

Digər həmsöhbətimiz Milli Məclisin deputatı Bəhruz Məhərrəmov bildirib ki, bu gün Cənubi Qafqazda müşahidə olunan situasiya göstərir ki, Qərb konkret olaraq ABŞ və Fransa başda olmaqla özünü "beynəlxalq ictimaiyyət" kimi təqdim edən bir sıra subyektlər Cənubi Qafqazda sülh və sabitliyi arzulamır.

“Parçala və hökm sür siyasətini rəhbər tutan həmin subyektlər üçün regionda münaqişələr öz maraqlarını diqtə etmək üçün ən yaxşı vasitədir və 30 il ərzində məhz bu mexanizmdən istifadə edərək, vasitəçəlik missiyası ilə pərdələnərək regionda təsir və nüfuz dairələrini genişləndirməyə cəhd ediblər. Lakin Azərbaycanın Vətən müharibəsi və antiterror əməliyyatlarındakı qələbələri ilə dəyişən reallıq bu gedişata son qoydu. Həmçinin, 2010-cu ildən etibarən Azərbaycanda vətəndaş cəmiyyəti institutlarının faəliyyətinin şəffaflaşdırılması regionda maraqlarını 5-ci kalon vasitəsilə diqtə Qərbi bu alətdən də məhrum etdi. Nəticə etibarilə biz bu gün Qərbin pərdəarxası tədbirlərlə yox, açıq radikal ritorikasına şahidlik etməkdəyik”.

Deputat bildirir ki, məsələ bundadır ki, daha öncə Ukrayna və Gürcüstanın timsalında dövlətlərdən tələ yemi kimi istifadə etmələri Qərb imperializminə bu bölgədə inam və etimadı sıfıra endirib. Qərbin daha öncə sınadığı təbliğat vasitələri, habelə təsir üsulları artıq regionda keçərli deyil. Nəticə etibarilə ABŞ və Fransanın timsalında biz həmin subyektlərin artıq regionda açıq şəkildə mübarizəyə qoşulduqlarını, bu məqsədlə Ermənistandan istifadə edərək, bu ölkənin hücum silahları və siyasi dəstəklə təmin edərək yeni qarşıdurmaya yol açmaq istədiklərinə şahidlik etməkdəyik.

“Həmin subyektlər eyni zamanda regionda yaranmış sülh üçün unikal imkanları heçə endirmək, Azərbaycan və Ermənistan arasında başlanan və vasitəçəsiz formada müəyyən uğurlara gətirib çıxarmış danışıqların fiyaskoya uğraması üçün bütün imkanları səfərbər ediblər. Lakin Azərbaycanın regionda əməliyyat şəraitinə nəzarət etməsi, həmçinin artan hərbi-siyasi imkanlar bu kimi cəhdləri heçə endirir və nəticə etibarilə biz bu gün regionda məhz Azərbaycanın diqtə etdiyi konfiqurasiyanın getdikcə daha da möhkəmlənməsinə şahidlik etməkdəyik”,- deyə millət vəkili sonlandırıb.

Aminə Nəzərova

Ukrayna ordusunun baş komandanı, general Aleksandr Sırski deyib ki, Rusiya Ukrayna cəbhəsindən Kursk vilayətinə 50 minə yaxın qoşun yeridib.

“Rusiya hərbi komandanlığı bu qüvvələri hücum əməliyyatlarını apardığı cəbhənin digər istiqamətlərindən götürüb”, – Sırski bildirib.

Onun dedikləri həqiqəti əks etdirir və bu gözlənilən idi. Ümumiyyətlə, Ukraynanın Kurska girməsi həm siyasi, həm strateji, həm də hərbi baxımdan yanlış qərar idi.

Mövzu ilə bağlı "Operativ Məlumat Mərkəzi-OMM"-ə açıqlama verən politoloq Turan Rzayev bildirib ki, hər şeydən öncə Ukrayna işğalçı ölkə deyil. Yəni ordusu işğalçı müharibəyə hazır deyildi. Qərbin verdiyi silahlar da daha çox müdafiə xarakterlidir. Ukrayna ordusunun say tərkibi də müharibəni rus torpaqlarına keçirmək üçün yetərli deyildi. Ordudakı fikir ayrılıqları, müharibənin rus torpaqlarında davam etməsi üçün iaşə və logistika çatışmazlığı kimi məsələlər əvvəlcədən bu planın uğursuz olacağını göstərirdi.

"Rus ordusu isə işğalçı müharibələrə öyrəşib. Yəni ölkə xaricində əməliyyat aparmaq, bölgə ələ keçirmək kimi təcrübəyə sahibdir. Bundan başqa, Rusiya logistika və iaşə kimi problemləri daha rahat aradan qaldıra bilir. Ən önəmlisi isə tarixi baxımdan ruslar rəqibi öz meydanına çəkib yoraraq əks-hücuma keçməyi yaxşı bacarır.

Diqqətçəkən digər bir detal qüvvələrin Kursk vilayətinə göndərilməsi ilə əlaqədar rusların hücumu Zaporojye, Xerson və Kramatorsk istiqamətində zəifləməsidir. Bu, hücum edəcək qüvvələrin məhz bu ərazilərdəki birliklərdən təşkil edildiyini göstərir".

Politoloq qeyd edib ki, digər məqam isə Qərb mətbuatında Ukrayna Prezidenti Volodimir Zelenskinin sülh axtarışında olduğuna dair yayılan məlumatlardır.

İtaliyanın “Corriere della Sera” qəzeti bildirir ki, Ukrayna mövcud şərtlərdə atəşkəsə hazırdır, amma bunun üçün ABŞ-dan təhlükəsizlik zəmanəti və Avropa İttifaqına (Aİ) üzvlük istəyir. Düzdür, Zelenskinin sülh axtarışında olmasına dair xəbərlərin həqiqəti əks etdirmədiyi deyilsə də, “Vaşinqton Post” qəzeti qərbli diplomata istinadla yazıb ki, Zelenski mövqeyi zəiflədiyi üçün Rusiya ilə danışıqlara daha açıq olub.

“Qərbdə hiss edirlər ki, Rusiyanın Ukraynanın 20%-dən çoxunu işğal etməsinə və hər hansı ərazini vermək ehtimalının az olmasına baxmayaraq, Zelenski Kremllə danışıqlara başlamaq üçün daha açıq olmağa başlayıb. Onlar Zelenskinin “Rusiya Ukraynanın təşkil etməyi planlaşdırdığı növbəti sülh sammitinə dəvət olunacaq” ifadəsini misal göstərirlər”, – mənbə bildirib.

Rusiya Kurskda əməliyyatlara başlamadan öncə Kiyevin geri çəkilməsini gözləyəcək. Bu baş verməsə, ordusu Kursk əməliyyatlarına başlayacaq. Aydın məsələdir ki, nəticədə Ukrayna ordusu məğlubiyyətə uğrayacaq və cəbhədəki psixoloji vəziyyət yenidən Kremlin lehinə dəyişəcək.

Ukraynanın vəziyyəti heç də ürəkaçan deyil. Zelenski üçün indiki məqamda tək optimal variant atəşkəs razılaşmasının imzalanmasıdır.

Bakı küçələrinə çəkilən avtobus zolaqları, zolaqlardan çıxan avtobuslar, yaranan tıxaclar və təyinat nöqtəsinə gecikən sərnişinlər…

Günümüzün aktual məsələlərindən biri də avtobus üçün çəkilən zolaqlarda hərəkət etməyən marşurtlardır. Bu isə, əlbəttə ki, tıxaca, eyni zamanda da qəzaya yol açır. Belə olduğu halda isə Bakı sakinləri və avtomobil sürücüləri bundan narazı olur, hərçənd avtomobillər həmin zolağa girməyə çalışsa da…

Burada isə yeni sual yaranır. Avtobus zolağına daxil olan avtomobillər üçün cərimə tətbiq olunursa, avtobus zolağından çıxan sürücülər üçün niyə cərimə tətbiq olunmur?

Mövzu ilə bağlı "Operativ Məlumat Mərkəzi-OMM"-ə açıqlama verən iqtisadi-ekspert Natiq Cəfərlinin sözlərinə görə, burada üstünlük prinsipi önə çəkilir.

“Bu, dünyanın hər yerində belədir. Üstünlük sərnişin nəqliyyatındadır. Yəni, sərnişin nəqliyyatı adi avtomobillərdən daha üstün vəziyyətdədir. Ona görə də həm öz yolu ilə, həm də adi yol ilə gedə bilər. Əlavə olaraq Bakıda avtobus yolları bütöv deyil”.

Ekspert deyir ki, Bakıda avtobus yolları çox məntiqsiz çəkilib. Avtobus yolları qırıq-qırıq xəttlərlə çəkilib. Bu isə tıxacların qarşısını almır, əksinə cərimələri artırır. Ona görə də, burada bütövlük prinsipi olmalıdır. Çünki avtobus yolu gedir, sonra kəsilir, 100 metrdən sonra yenidən başlayır, həmin 100 metr boyu yenə tıxac yaranır, avtobus gəlir həmin tıxacda ilişir. Bir sözlə avtobus zolaqları çox məntiqsiz sistem ilə çəkilib.

Digər müsahibimiz nəqliyyat üzrə ekspert Aslan Əsədovun sözlərinə görə, avtomobillərin avtobus zolağına daxil olması, avtobusların isə həmin zolaqdan kənara çıxması yolverilməz hadisədir.

“Bununla bağlı avtobus sürücüləri müəyyən əsas gətirməyə çalışarsa, bu absurd hesab olunmalıdır. Çünki avtobus zolaqları kifayət qədər genişdir. Avtobus zolaqlarına isə əlavə müdaxilələr və avtomobillər tərəfindən zəbt olunması çox müşahidə olunmur”.

Ekspertin fikrincə, avtobus zolaqlarında hərəkət etməyin mümkün olmadığını iddia edən şəxslər düzgün düşünmür. Məsələnin digər tərəfi isə odur ki, avtobus zolaqlarından avtobusun kənara çıxmasına əsas səbəb zolaqda hərəkət zamanı nəqliyyat vasitələrinin müəyyən dərəcədə sərbəst idarə olunmasıdır. Belə hərəkətlər isə qəza riskini artıra bilər. Əksər hallarda isə qəzadan yayınmaq çətin olur.

Məsələ ilə bağlı Azərbaycan Yerüstü Nəqliyyat Agentliyindən "Operativ Məlumat Mərkəzi-OMM"-ə bildirilib ki, manevretmə, geridönmə və müxtəlif maneələrlə rastlaşdığı təqdirdə avtobuslar onlar üçün ayrılmış zolaqdan kənara çıxmaq məcburiyyətində qalırlar:

"Bu kimi hallar olmadığı təqdirdə avtobuslar təşkil edilmiş zolaqla hərəkət etməlidirlər. Bununla bağlı daşıyıcılarla iş aparılır. Onlara sürücülərin sərnişindaşıma və yol hərəkəti qaydalarına riayət etmələri ilə bağlı maarifləndirici söhbətlərin aparılması tapşırığı verilir".

Prezident İlham Əliyev Rusiya Federasiyasına səfəri çərçivəsində Müstəqil Dövlətlər Birliyinin (MDB) Dövlət Başçıları Şurasının iclasında çıxışında olduqca mühüm məqamlara toxunub, vacib məsələlərdən bəhs edib.

Bunu "Operativ Məlumat Mərkəzi-OMM"-ə açıqlamasında millət vəkili Məlahət İbrahimqızı deyib.

O bildirib ki, Azərbaycan Rusiya əlaqələri çoxəsrlik tarixə söykənir.

“Bu gün Rusiya-Azərbaycan münasibətləri dinamik şəkildə inkişaf edir. Azərbaycan Prezidentinin Rusiyaya, Rusiya Federasiyasının Prezidentinin isə ölkəmizə səfərləri münasibətlərin yeni müstəvidə inkişafında mühüm önəm kəsb edir”.

Deputat qeyd edib ki, ölkəmizin başçısı MDB Dövlət Başçıları Şurasının iclasında Cənubi Qafqazın lider dövləti olan Azərbaycanın dünya və region ölkələri ilə əməkdaşlıq məsələlərinə toxunub:

“Azərbaycanın balanslaşdırılmış xarici siyasət kursundan bəhs edilib. Rusiya Federasiyası Prezidentinin Azərbaycana bu yaxınlardakı dövlət səfərinin Rusiya-Azərbaycan münasibətlərinin müttəfiqlik xarakterini bir daha təsdiqi olduğu vurğulanıb. Bu konteksdə iki ölkə arasında əldə olunmuş razılaşmaların həyata keçirilməsi gələcək münasibətlər üçün mühüm amil olduğu önə çəkilib. Cənab Prezident həmçinin Emoməli Şərifoviç Rəhmona Tacikistan Respublikasının növbəti il MDB-də sədrliyində uğurlar arzulayıb. Eyni zamanda, MDB Humanitar Əməkdaşlıq Şurasının qərarına əsasən, Azərbaycanın Şərqi Zəngəzur bölgəsinin Laçın şəhəri 2025-ci ildə MDB-nin mədəniyyət paytaxtı elan edilməsinin xüsusi önəminə toxunulub.

Laçın Azərbaycanın 30 ilə yaxın müddətdə Ermənistanın işğalı altında olmuş şəhərlərindən biri olub. Şəhər ermənilər tərəfindən demək olar ki, tamamilə dağıdılmışdı. Artıq öz azadlığına qovuşan Laçın şəhəri bərpa olunub. Laçında artıq yeni həyat başlayıb, keçmiş məcburi köçkünlər öz evlərinə qayıdıblar. Bu mənada Laçının MDB-nin mədəniyyət paytaxtı elan edilməsi həm laçınlılar, həm də bütün Azərbaycan xalqı tərəfindən böyük rəğbətlə qarşılanıb.

Ölkəmizin başçısı çıxışında məhz bu amillərə diqqət çəkərək Azərbaycanın tərəfdaş ölkələrlə hər zaman yüksək münasibətlər qurduğunu vurğulayıb. Növbəti il Azərbaycanda III MDB Oyunlarının keçirilməsi də mühüm əhəmiyyət kəsb edir. III MDB idman yarışlarının Gəncə şəhəri ilə yanaşı Azərbaycanın 10-dan çox şəhərində keçirilməsinin əhəmiyyətindən bəhs olunub.”

Millət vəkili cənab Prezidentin çıxışında bir aydan sonra Bakıda keçiriləcək böyük beynəlxalq tədbir olan COP29 iqlim konfransı ilə bağlı da görülən işləri dövlət başçılarının diqqətinə çatdırdığını söyləyib:

“Azərbaycanın məhz 200-ə yaxın ölkənin dəstəyi ilə bu konfransa ev sahibliyinin ölkəmizə olan yüksək hörmət və ehtiramın bariz nümunəsi olduğu qeyd edilib. Ölkəmizin başçısı eyni zamanda MDB dövlət başçılarının İkinci Dünya müharibəsində Qələbənin 80 illiyi ilə bağlı müraciəti ilə bağlı da fikirlərini bölüşüb. Azərbaycan bu ümumi qələbəyə vermiş olduğu töhfələrdən bəhs olunub. Azərbaycanlıların da bu qələbədə böyük qəhrəmanlıq və sucaət göstərdiyi qeyd edilib. Bu mənada 9 May Qələbəsi MDB-yə üzv dövlətlərin gələcək əməkdaşlığının mühüm amili kimi qiymətləndirilib. Azərbaycan bu əməkdaşlığa böyük əhəmiyyət verir. Sözsüz ki, ölkəmiz bundan sonra da qarşılıqlı fəaliyyətin daha da möhkəmləndirilməsi üçün öz töhfəsini verəcək.

Prezident İlham Əliyevin səfər zamanı “Rossiya-1” televiziya kanalına müsahibəsində vermiş olduğu mesajlar da olduqca önəmlidir. Azərbaycana qarşı aparılan qarayaxma kampaniyasına toxunulub. Bu xüsusda ABŞ-ın ölkəmizə qarşı əsassız sanksiyalarının mahiyyətindən bəhs edilib. Təbii ki, bu əsassız sanksiyalar qeyri-qanuni və əsassızdır. Daha çox Amerikada uzun on illiklər lövbər salmış artıq bu ölkənin siyasi sisteminə nüfuz etmiş erməni lobbisinin növbəti məkirli planıdır. Azərbaycan haqlı olduğu halda ABŞ konqresinin bu kimi məsələlər üzərindən qarayaxma kampaniyası aparmasının yolverilməzliyi vurğulanıbdır”, - deyə o sonlandırıb.

Mehman Mirzəzadə

Oktyabrın 8-də Moskvada Azərbaycan Respublikasının Prezidenti İlham Əliyevin Rusiya Federasiyasının Prezidenti Vladimir Putinlə görüşü olub.

Görüşlə bağlı "Operativ Məlumat Mərkəzi-OMM"-ə fikirlərini bildirən Sosial Tədqiqatlar Mərkəzinin (STM) mətbuat xidmətinin rəhbəri Əziz Əlibəyli bildirib ki, indiki kontekstdə Rusiyanın iki hədəfi var ki, bunlardan biri sülh müqaviləsinin imzalanması və regionda kommunikasiyaların açılmasıdır. Ancaq görünən odur ki, iki ölkə rəhbərinin nəzərdə tutulmuş görüşü reallaşmadısa, bu, Ermənistana görə baş vermiş durumdur. Xüsusilə də, Azərbaycan-ABŞ münasibətləri son zamanlar kəskinləşir, bu da Qərbin Azərbaycana təzyiqinin sülh müqaviləsini Qərbdə imzalamaq fikri ilə əlaqədardır.

Siyasi-ekspert indiki vəziyyətdə bu məsələlərdə ciddi bir irəliləyişin olduğunu görmədiyini, ancaq təşəbbüsün də təxirə düşmədiyini qeyd edib. Ə.Əlibəyli bildirib ki, əgər təşəbbüs bizim bölgədə, regionda qalırsa, təbii ki, Zəngəzur məsələsinin müzakirə olunması da gündəmdədir. Qarşıdan COP-29 gəlir, bu çərçivədə Ermənistanın Azərbaycanla sülh müqaviləsi bağlamağa cəhd etməsi də, başa düşüləndir. Ancaq bu sülh müqaviləsi Ermənistan sülh müqaviləsidirsə, Azərbaycanın da ona razı olmaması təbiidir.

“Bu görüşlərdə əsas məsələlərdən biri, yekun nəticəyə nail olmaq idi. Ancaq belə görünür ki, Ermənistanın dağıdıcı addımı bunlara imkan vermir”, - deyə şərhçi vurğulayıb.

Digər həmsöhbətimiz, millət vəkili Ceyhun Məmmədov bildirib ki, prezidentin bu görüşü xüsusi önəm və əhəmiyyət daşıyır.

“Azərbaycan MDB dövlətləri ilə, eyni zamanda Rusiya ilə sıx əlaqələrə malikdir. Bu gün bu əlaqələrin inkişafında həm cənab prezidentin, həm də Rusiya prezidentinin böyük rolu və xidmətləri var. Bu görüşdə Zəngəzur dəhlizi ilə də geniş müzakirələr aparıldı. Biz artıq deyə bilərik ki, Azərbaycan-Rusiya münasibətləri daha da sürətlə inkişaf edir, yeni bir mərhələyə qədəm qoyur və bu da ikitərəfli əlaqələrin nə qədər önəmli, əhəmiyyət kəsb etdiyini göstərir”, - deyə deputat qeyd edib.

Aminə Nəzərova

Rusiya yeni bir məsələ ilə yenidən gündəmə gəlir. O, Azərbaycanda yeni diplomatik nümayəndəlik açmaq məsələsində israr edir. Rusiya Xarici İşlər Nazirliyinin konsulluq idarəsinin rəhbəri Aleksey Klimov TASS-a müsahibəsində bildirib ki, hazırda Azərbaycanın ərazisində, o cümlədən Qarabağda ölkənin yeni nümayəndəliklərinin açılması məsələsi siyasi səviyyədə müzakirə olunur. O qeyd edib ki, Azərbaycan tərəfi ilə müvafiq müqavilələr bağlandığından sonra konsulluq idarəsi bununla bağlı əməli addımların atılmasına cəlb olunacaq.

Xatırladaq ki, Rusiya əvvəl də Qarabağda nümayəndəlik açmaq istədiklərini bəyan edib. Deputat Hikmət Babaoğlu isə yerli KİV-ə açıqlamasında bildirib ki, konsulluq xidməti xüsusi diplomatik qaydada xidmət göstərən ayrıca diplomatik xidmət formasıdır. Bu xidməti də zəruri edən şərtlər olmalıdır. Hazırkı mərhələdə Rusiyanın Azərbaycanın ərazisində əlavə yeni konsulluq xidmətlərini zəruri edən şərtlər və regionlar yoxdur. İndiki mərhələdə bu, sadəcə birtərəfli mövqedir, Rusiyanın mövqeyidir. Azərbaycanın bu məsələyə münasibəti olmadan təhlil aparmaq doğru olmaz. Amma şübhəsiz ki, belə bir xidmət açılacaqsa, bunun səbəbləri əsaslandırılacaq.

Bəs Rusiyanın bu istəyinin əsas səbəbi nədir? Niyə Rusiya bu qədər israr edir? Konsulluq açılsa, bu nə ilə nəticələnə bilər?

Mövzu ilə bağlı "Operativ Məlumat Mərkəzi-OMM"-ə açıqlama verən politoloq Elman Vəliyevin sözlərinə görə Rusiyanın əsas məqsədi Azərbaycanı əldən verməməkdir.

“Qarabağda konsulluq açmaq niyyəti də bundan qaynaqlanır. Bilir ki, bunu etməsə həmin bölgəyə digər maraq qüvvələri gələcək. Hazırda Cənubi Qafqazda Azərbaycan ilə Rusiya yaxın təmasdadır. Rusiyaya əleyhdar qruplar onun bütün dayaqlarını əlindən almağa, Ermənistanı və Gürcüstanı bu yolla aparmağa çalışırlar. Azərbaycan üçün ən optimal variant isə balansı qorumaqdır. Ağıllı siyasətin gücü də budur elə. Rusiya ilə hazırda vəziyyəti gərginləşdirmək ziyandan başqa heç nə verməz, amma bu o demək deyil ki, Rusiya nə desə o olmalıdır. Balans siyasəti də məhz buna görə var”.

Politoloq deyir ki, kiçik aktorlar üçün ən uyğun punkt həm Rusiya, həm də Qərblə əməkdaşlıq etməkdir. Rusiyanın diplomatik mövcudluğunu genişləndirmək istəyinin maneəsi digər qrupların istəklərinə şərait yaratmaqdır. Yəni həm Türkiyənin, həm Qərbin, həm ABŞ-nin diplomatik mexanizmləri ilə əlbir olmaqdır. Təkmövqeli siyasət yürütmək hazırda doğru deyil. Gözləmə mövqeyi lazımdır ki, yanlış addım atmayaq.

"Rusiyanın konsulluq açmaq istəyi normaldır. Çünki Azərbaycanın da Rusiyanın ərazisində bir neçə konsulluq xidməti mövcuddur".

Bu sözləri isə saytımıza açıqlamasında REAL partiyasının sədri Natiq Cəfərli deyib.

Müsahibimizin sözlərinə görə, Rusiyanın ərazisi həddindən artıq genişdir. Rusiyada yaşayan azərbaycanlıların sayını nəzərə alsaq, konsulluq xidmətinin müxtəlif şəhərlərdə açılmasının bir məntiqi olduğunu görərik. Azərbaycan isə ərazi olaraq çox kiçik ölkədir və ərazimizi nəzərə alsaq, Bakıdakı səfirlik, həm də konsulluq fəaliyyətini yerinə yetirmək üçün kifayət edir. Rusiyanın israrla Qarabağda konsulluq xidməti açması isə anlaşılan deyil. Hətta hökumət bununla bağlı rəsmi sorğu göndərməlidir ki, bu israrın və istəyin səbəbi nədir?

"Rusiyanın burada gizli planları mövcud ola bilər. Çünki Qarabağdan könüllü şəkildə köç edən erməni əhalisinin bir qismində Rusiya pasportları var, sayları isə müxtəlifdir. Bəziləri 10 min, bəziləri isə 25 min olduğunu deyir. Xankəndi və ya Qarabağda konsulluq xidmətinin açılması sonradan Rusiyaya bir fürsət verə bilər ki, həmin bölgələrdən köç etmiş ermənilər Rusiya vətəndaşı olduqları üçün onların hüquqlarının qorunması ilə bağlı Rusiya müəyyən həmlələr həyata keçirə bilər. Bunu mütləq nəzərə almaq lazımdır. Konsulluq xidməti istəyirlərsə, gəlsinlər Gəncədə, Sumqayıtda, Şəkidə açsınlar. Sırf Qarabağı hədəf götürüblərsə, burada səbəblər olmalıdır".

Digər müsahibimiz politoloq Xəqani Cəfərli deyir ki, Rusiyanın Azərbaycanda, xüsusilə də Qarabağda yeni nümayəndəliklərinin açmaqda israr etməsi Moskvanın təsir imkanlarını saxlamaq və artırmaq siyasətinə xidmət edir. Rusiya postsovet məkanı üzərində təsir imkanını itirdiyini görür, ancaq bununla barışmaq istəmir. Siyasi, iqtisadi və hərbi təsir imkanlarını itirən Rusiya sonuncu vasitədən, diplomatik təsir imkanlarından istifadə etmək istəyir. Bununla Cənubi Qafqazda Türkiyə və Qərblə rəqabət imkanlarını qorumaq niyyətindədir. Gürcüstanda bu ayın 26-da keçiriləcək parlament seçkilərindən sonra Rusiyanın Azərbaycanda güclənmək istəyi daha da artacaq.

"Bu ehtimalın qarşısını almaq və Rusiyanın ölkəmizdəki diplomatik mövcudluğunu genişləndirmək istəyindən yayınmağın yeganə yolu Avroatalntik təhlükəsizlik məkanına inteqrasiya etməkdir. Çünki, Avrasiyada hələlik cəmi iki alyansı mövcuddur. Bunlardan biri NATO, digəri Kollektiv Təhlükəsizlik Müqaviləsi Təşkilatıdır. KTMT Varşava Müqaviləsi Təşkilatı kimi zamanın sınağından çıxmadı. Ümumiyyətlə, Rusiyanın güclü təhlükəsizlik sistemi yaratmaq imkanı yoxdur və bir daha olmayacaq. Ona görə zamanın tələbinə və şərtlərinə uyğun olaraq Avroatlantik məkana intiqrasiyanın alternativi yoxdur".

Mədinə