Stas Pokatilov: “Sabah” “Borussiya” ilə heç-heçə edə bilərdi

“Sabah”ın qapıçısı Stas Pokatilov UEFA Çempionlar Liqasının əsas mərhələsinin üçüncü turunda Dortmund “Borussiya”sına qarşı keçirdikləri oyunda komandasının ən azı heç-heçəyə layiq olduğunu bildirib. O, 1:2 hesablı məğlubiyyətdən sonra fikirlərini Qazaxıstanın ASnews.kz nəşri ilə bölüşüb.

“Hazırda nə emosiyam, nə də gücüm qalıb. Ən azı uduzmamağı çox istəyirdik və düşünürəm ki, bunun üçün imkanlarımız var idi. Amma “Borussiya” artıq başqa səviyyədir, “Slaviya” deyil. Hesab edirəm ki, debütant komanda kimi layiqli oyun göstərdik, xüsusilə də ilk dəqiqələrdən yaxşı təsir bağışladıq. Eyni ruhda davam edəcəyik”, – deyə Pokatilov bildirib.

Qapıçı Praqa “Slaviya”sı ilə oyundan sonra Çempionlar Liqasının ikinci turunun rəmzi komandasına düşməsinə də münasibət bildirib. Onun sözlərinə görə, komanda autsayder sayıldıqda müdafiəçilər və qapıçılar daha çox fərqlənmək imkanı əldə edirlər. Bununla belə, Pokatilov fərdi uğurlardansa komandanın nəticələrinə üstünlük verdiyini qeyd edib.

33 yaşlı futbolçu turnirin əsas mərhələsində oynamağın onun üçün xüsusi məna daşıdığını vurğulayıb. “Bu, yüz faiz arzudur. Demək olar ki, adi həyətlərdən futbola başlayan qazaxıstanlı uşaqlar üçün nümunədir. Bu, arzuların gerçəkləşdiyini və hər şeyin mümkün olduğunu göstərir”, – deyə qapıçı əlavə edib.

Oktyabrın 20-də Bakı Olimpiya Stadionunda keçirilən matçda “Sabah” “Borussiya”ya 1:2 hesabı ilə məğlub olub. Üç turdan sonra Azərbaycan təmsilçisinin aktivində üç xal var.