Suriya gələn ay Fransada keçiriləcək G7 sammitinə dəvətli ölkə kimi qatılacaq.
“Operativ Məlumat Mərkəzi-OMM”xəbər verir ki, bu barədə "Reuters" agentliyi məlumat yayıb.
Məlumata görə, Suriya Prezidenti Əhməd əş-Şaraa sammitdə iştirak edəcək. Bu, Suriyanın G7 sammitində ilk iştirakı olacaq.
Sammitin 15–17 iyun tarixlərində Fransanın cənub-şərqində yerləşən Evian-le-Ben şəhərində keçirilməsi planlaşdırılır.
Dəvət məktubunun bu həftə G7 maliyyə danışıqları üçün Parisdə olan Suriyanın maliyyə naziri Yusr Barniaya göndərildiyi bildirilir.
Suriya rəsmilərindən birinin sözlərinə görə, ölkənin sammitdə iştirakı xüsusilə Hörmüz boğazı ilə bağlı yaranan çətinliklər fonunda onun təchizat zəncirlərində potensial strateji rolunu təqdim etməyə yönələcək.
Qeyd edək ki, boğazdan keçən gəmiçilik fevral ayının sonlarında İrana qarşı müharibənin başlaması ilə əsasən dayanmış, bu isə qlobal iqtisadiyyatda böhrana səbəb olmuşdu.
