OMM Redaksiyası
Səudiyyə Ərəbistanının rəhbərlik etdiyi koalisiya cümə axşamı səhər ölkənin Şərq əyaləti üzərində pilotsuz uçuş aparatını ələ keçirərək məhv etdiyini bildirib.
Koalisiya sözçüsü Türki əl-Maliki hadisə ilə bağlı açıqlama verib, lakin PUA-nın mənşəyi barədə məlumat açıqlamayıb.
Bir neçə saat əvvəl Yəməndəki husilər Səudiyyə Ərəbistanının paytaxtı Ər-Riyaddakı Kral Xalid Beynəlxalq Hava Limanına ballistik raketlə zərbə endirdiklərini iddia etmişdilər. Tələfat və dağıntılar barədə məlumat verilməmişdi.
Koalisiya çərşənbə günü husilərin Ər-Riyada doğru buraxdığı ballistik raketi ələ keçirərək məhv etdiyini bildirmişdi. Paytaxtda və yaxınlıqdakı Əl-Xarc vilayətində xəbərdarlıq siqnalları işə düşmüşdü.
Husilər çərşənbə günü Səudiyyə Ərəbistanındakı hava limanlarına və neft obyektlərinə hücumları davam etdirəcəklərini bəyan etmişdilər. Bundan bir gün əvvəlki zərbənin “Saudi Aramco” neft şirkətinin baş qərargahına ciddi ziyan vurduğu barədə mənbələr məlumat vermişdi.
