OMM Redaksiyası
Səudiyyə Ərəbistanı və Suriya müdafiə sahəsində əməkdaşlıq sazişi imzalayıb. Bu, Yəməndəki husilərin krallığa raket və dron hücumlarının davam etdiyi vaxta təsadüf edir.
AnewZ-in Səudiyyə dövlət xəbər agentliyi SPA-ya istinadən verdiyi məlumata görə, iki ölkənin müdafiə nazirlikləri arasında razılaşma noyabrın 4-də, Suriya Prezidenti Əhməd əş-Şaraanın Ər-Riyada səfəri zamanı imzalanıb. Sazişin təfərrüatları açıqlanmayıb.
Səfər çərçivəsində Əhməd əş-Şaraa Səudiyyə Ərəbistanının vəliəhdi Məhəmməd bin Salmanla bir aydan az müddətdə ikinci dəfə görüşüb.
Husilərin hücumları davam edir
İranla müttəfiq olan husilər son həftələrdə Səudiyyə Ərəbistanına hücumları intensivləşdirib. Bu, Ər-Riyadla Yəməndəki silahlı qrup arasında qarşıdurmanın yenidən alovlanmasına səbəb olub.
Səudiyyə Ərəbistanı müdafiə və hücum xarakterli dəstək almaq üçün ABŞ, Avropa ölkələri və Yaxın Şərqdəki digər dövlətlər də daxil olmaqla beynəlxalq müttəfiq və tərəfdaşlarına müraciət edib.
“Reuters” oktyabrda Suriyanın Səudiyyə Ərəbistanına hərbi yardım göstərmək məsələsini nəzərdən keçirdiyini yazmışdı. Həmin vaxt suriyalı diplomat hərbi əməkdaşlıq və ya təcrübə mübadiləsi ilə bağlı istənilən müraciətin “yalnız rəsmi kanallar vasitəsilə” həyata keçiriləcəyini demişdi.
Diplomat belə əməkdaşlığın iki ölkə arasında mövcud ikitərəfli sazişlər çərçivəsində həyata keçiriləcəyini də bildirmişdi.
Suriya üçün 403 milyon dollardan çox güzəştli kredit
Müdafiə sazişi Əhməd əş-Şaraanın səfəri zamanı imzalanan bir neçə razılaşmadan biri olub. İnkişaf kreditləri və qrantları təqdim edən Səudiyyə İnkişaf Fondu Suriyanın Maliyyə Nazirliyi ilə ümumi məbləği 403 milyon dollardan çox olan güzəştli kreditlər üzrə altı saziş imzalayıb.
Suriyanın Maliyyə Nazirliyinin məlumatına görə, vəsait ölkənin inkişafına və ictimai xidmətlər sektoruna dəstək üçün ayrılacaq.
Səudiyyə Ərəbistanı Suriya hökumətinin əsas maliyyə dəstəkçilərindən birinə çevrilib. Keçmiş prezident Bəşər Əsəd devrildikdən sonra Ər-Riyad Dəməşqin beynəlxalq güclərlə əlaqələrini bərpa etməsinə dəstək verib.
