Azərbaycanda fevralın 5-də qarlı və şaxtalı hava şəraitinin müşahidə olunacağı, bəzi ərazilərdə yolların buz bağlayacağı gözlənilir.
"Operativ Məlumat Mərkəzi-OMM" Milli Hidrometeorologiya Xidmətinə istinadən xəbər verir ki, hava şəraiti xüsusilə gecə və səhər saatlarında nəqliyyat üçün risk yarada bilər.
Bakıda və Abşeron yarımadasında havanın dəyişkən buludlu olacağı, arabir tutulacağı, əsasən isə yağmursuz keçəcəyi proqnozlaşdırılır. Bununla belə, fevralın 4-dən 5-nə keçən gecə və axşam saatlarında bəzi ərazilərdə yağıntı, o cümlədən qar yağması ehtimal edilir. Arabir güclənən şimal-qərb küləyi gündüz saatlarında şimal-şərq istiqamətinə keçəcək.
Havanın temperaturu gecə -2 dərəcə şaxtadan +1 dərəcəyədək, gündüz isə 2–4 dərəcə isti olacaq. Atmosfer təzyiqinin 767 mm civə sütunundan 770 mm civə sütununa yüksələcəyi, nisbi rütubətin isə 70–80 faiz təşkil edəcəyi bildirilir. Gecə və səhər saatlarında bəzi şəhərətrafı yollarda buzlanma ehtimalı var.
Regionlarda da bəzi ərazilərdə arabir yağıntı, əsasən qar yağacağı gözlənilir. Ayrı-ayrı yerlərdə yağıntıların intensiv olacağı istisna edilmir. Səhər saatlarından başlayaraq yağıntılar tədricən zəifləyəcək, gün ərzində isə hava əsasən yağmursuz keçəcək. Bəzi rayonlarda duman müşahidə olunacaq, mülayim qərb küləyi əsəcək.
Rayonlarda havanın temperaturu gecə 1–5 dərəcə isti, gündüz 5–9 dərəcə isti olacaq. Dağlıq ərazilərdə gecə 3–8 dərəcə şaxta, yüksək dağlıq rayonlarda isə 8–13 dərəcə şaxta, gündüz isə 0–3 dərəcə şaxta proqnozlaşdırılır.
Milli Hidrometeorologiya Xidməti xəbərdarlıq edir ki, əsasən dağlıq və dağətəyi rayonlarda yolların buz bağlaması gözlənilir və sürücülərdən ehtiyatlı olmaları xahiş olunur.
