Rusiya xarici işlər nazirinin müavini Sergey Ryabkov Havanada keçirilən mətbuat konfransında Moskvanın Kubanı heç vaxt tərk etməyəcəyini və ABŞ-nin sanksiyaları nəticəsində yaranan enerji böhranını aradan qaldırmaq üçün dəstəyini davam etdirəcəyini vurğulayıb.
“Operativ Məlumat Mərkəzi-OMM”-in xarici KİV-ə istinadən xəbərinə görə, Ryabkov bildirib ki, Rusiya Qərb yarımkürəsindəki strateji, iqtisadi və hərbi maraqlarından geri çəkilmək niyyətində deyil.
Enerji dəstəyinin genişləndirilməsi məsələsinə toxunan diplomat, Kubanın makroiqtisadi vəziyyətinin pisləşdiyini və ABŞ-nin tətbiq etdiyi de-fakto neft blokadasının ölkədə ciddi problemlərə səbəb olduğunu qeyd edib.
Rusiya rəsmisi əlavə edib ki, Moskvanın logistik dəstəyi yalnız keçən ay adaya çatdırılan xam neftlə məhdudlaşmayacaq. O, ABŞ-nin sanksiyalarını beynəlxalq normaların pozulması kimi qiymətləndirərək, "Biz Kubaya xəyanət edə bilmərik, bu, qeyri-mümkündür," deyə bildirib.
Martın 31-də "Anatoly Kolodkin" adlı Rusiya gəmisi ağır sanksiyalara baxmayaraq, Matanzas körfəzinə təxminən 700 min barel neft çatdırıb. ABŞ Dövlət Departamenti bu addımın yalnız humanitar məqsədlərlə həyata keçirildiyini bildirsə də, bu hadisə böyük güclərin rəqabətini bir daha gündəmə gətirib.
Ryabkov həmçinin ABŞ-nin Qərb yarımkürəsindəki siyasətini tənqid edərək, Vaşinqtonun Rusiya və Çini regiondan sıxışdırıb çıxarmağa çalışdığını iddia edib. O, "NATO" və ABŞ-nin Şərqi Avropadakı təsirinə qarşı Kubanı strateji tərəfdaş kimi gördüklərini vurğulayıb.
