OMM Redaksiyası
AFFA prezidenti Rövşən Nəcəf Azərbaycanın FIFA U-15 Dünya Çempionatı və Festivalına ev sahibliyi etməyə hazır olduğunu açıqlayıb. O, fikirlərini şəxsi “Instagram” hesabında paylaşıb.
Nəcəf bildirib ki, dünyanın 189 ölkəsindən gənc futbolçuların qatılacağı tədbirə ev sahibliyi etmək qürurvericidir. Onun sözlərinə görə, yarış iştirakçılara beynəlxalq təcrübə, yeni dostluqlar və unudulmaz anlar qazandıra bilər.
Yarış oktyabrın 22-də başlayacaq
AFFA prezidenti millimiz də daxil olmaqla, bütün komandalara uğurlar arzulayıb. O, gənc futbolçuları həvəslə oynamağa, ədalətli mübarizə aparmağa və yarışın hər anından zövq almağa çağırıb. Nəcəf gələcəyin futbol ulduzlarının ilk böyük addımlarını Azərbaycanda ata biləcəyini qeyd edib və iştirakçıları Bakıya salamlayıb.
U-15 dünya çempionatı və festivalı oktyabrın 22-dən 30-dək Hövsan Yarış Kompleksində keçiriləcək. Turnirin açılış və final oyunları Bakı Kristal Zalında təşkil olunacaq, ilk oyunlar isə oktyabrın 24-də başlayacaq.
Yarışda 189 ölkənin iştirakı və 1000-ə yaxın matçın keçirilməsi nəzərdə tutulur. Turnir dünyanın müxtəlif yerlərindən yeniyetmə futbolçuları bir araya gətirəcək.
