Rusiya və Çin media tərəfdaşlığını dərinləşdirmək barədə razılığa gəliblər.
“Operativ Məlumat Mərkəzi-OMM”xəbər verir ki, bu barədə Pekində keçirilən Rusiya–Çin liderlərinin danışıqlarından sonra yayılan birgə bəyanatda qeyd olunub.
Sənəddə bildirilir ki, tərəflər media sahəsində əməkdaşlığı gücləndirəcək, Rusiya–Çin media forumuna birgə ev sahibliyi edəcək və əsas media qurumları arasında qarşılıqlı səfərləri asanlaşdıracaqlar.
Həmçinin qeyd olunur ki, kadr hazırlığı sahəsində əməkdaşlıq genişləndiriləcək, media işçiləri üçün qarşılıqlı əlverişli iş şəraiti yaradılacaq.
Bəyanata əsasən, tərəflər rəqəmsal diplomatiya və yeni media texnologiyaları sahəsində təcrübə mübadiləsi aparmağı, eləcə də regional media qurumları arasında əməkdaşlığı dərinləşdirməyi planlaşdırır.
Sənəddə vurğulanıb ki, Rusiya və Çin birgə məzmun istehsalını, internet və yeni media sahəsində kadr hazırlığını və onlayn media forumlarının təşkilini dəstəkləyir. Həmçinin iki ölkədən olan bloqçular arasında mübadilənin təşviq olunacağı qeyd edilib.
