Pentaqonun rəsmi məlumatına görə, İrana qarşı əməliyyatların başlanmasından bəri ən azı 390 amerikalı hərbçi yaralanıb.
“Operativ Məlumat Mərkəzi-OMM” xəbər verir ki, yaralananlardan 346 nəfəri birbaşa döyüş əməliyyatları zamanı xəsarət alıb.
Zərərçəkənlərin arasında 231 nəfər ordunun şəxsi heyəti, 63 nəfər Hərbi Dəniz Qüvvələrinin dənizçisi, 19 nəfər Dəniz Piyadası və 33 nəfər Hərbi Hava Qüvvələrinin hərbçisi yer alır. Hesabatda qeyd olunur ki, yaralıların əksəriyyəti artıq öz xidmətinə qayıdıb.
ABŞ Silahlı Qüvvələrinin Birgə Qərargah Rəisləri Komitəsinin sədri, general Den Keyn daha əvvəl bildirib ki, amerikalı hərbçilərin yaralanmalarının böyük hissəsi İranın pilotsuz uçuş aparatları ilə həyata keçirdiyi hücumlar nəticəsində baş verib.
Ümumi məlumata görə, bu günə qədər döyüşlərdə 13 amerikalı hərbçi həlak olub. Ölüm hallarından altısı Küveytdə, biri isə Səudiyyə Ərəbistanında qeydə alınıb. Digər hərbçilər isə ABŞ-a məxsus tanker təyyarəsinin qəzaya uğraması nəticəsində həyatını itirib.
