"Sevilya" və "Vulverhempton"da çalışmış məşhur ispaniyalı mütəxəssis Xulen Lopeteqiyə Səudiyyə Ərəbistanı çempionatından maliyyə baxımından sərfəli təklif gəlib.

"Operativ Məlumat Mərkəzi-OMM" AS-a istinadən xəbər verir ki, “Əl-İttihad” rəhbərliyi baş məşqçiyə 18 milyon avro maaş təklif edib.

Lakin bu variantdan imtina edib. O, karyerasını Avropada davam etdirmək istəyir.

Xatırladaq ki, 57 yaşlı çalışdırıcının son iş yeri ingilis "Vulverhempton"u idi.

İspaniyanın “Atletiko” (Madrid) komandası yeni futbolçu ilə anlaşıb.

"Operativ Məlumat Mərkəzi-OMM" klubun rəsmi saytına istinadən xəbər verir ki, paytaxt təmsilçisi “Real Sosyedad”dan ispaniyalı müdafiəçi Robin Le Normandla razılaşdığını açıqlayıb.

Qarşıdakı günlərdə 28 yaşlı oyunçu ilə rəsmi müqavilə imzalanacaq.

Qeyd edək ki, Robin Le Normand İspaniya millisinin heyətində Almaniyada keçirilən Avropa çempionatının qalibi olub.

Argentinanın "River Pleyt" klubunun futbolçusu Franko Mastantuono karyerasını İspaniyada davam etdirməyə çox yaxındır.

"Operativ Məlumat Mərkəzi-OMM" "Sport.es" nəşrinə istinadən xəbər verir ki, 16 yaşlı yarımmüdafiəçi "Real"a keçəcək.

"River Pleyt"in prezidenti Jorje Pablo Brito danışıqlar prosesini başa çatdırmaq üçün İspaniyaya gedib. Madrid klubu artıq argentinalı futbolçu ilə şəxsi müqavilənin şərtlərini razılaşdırıb.

Mastantuono yalnız yetkinlik yaşına çatdıqdan sonra komandaya qoşula biləcək.

Qeyd edək ki, yarımmüdafiəçi 2019-cu ildən "River Pleyt"in aşağı yaş qruplarında çıxış edir.

İspaniyanın "Real" və İtaliyanın "Atalanta" komandaları arasında keçiriləcək UEFA Superkuboku matçını idarə edəcək hakim açıqlanıb.

"Operativ Məlumat Mərkəzi-OMM" xəbər verir ki, bu barədə UEFA-nın mətbuat xidməti məlumat yayıb.

Qarşılaşma isveçrəli Sandro Şörerə həvalə edilib.

Qeyd edək ki, avqustun 14-də Polşanın Varşava şəhərində baş tutacaq oyun Bakı vaxtı ilə saat 23:00-da start götürəcək.

AFFA Hakimlər Komitəsinin yeni sədri müəyyənləşib.

"Operativ Məlumat Mərkəzi-OMM" milli assosiasiyanın rəsmi saytına istinadən xəbər verir ki, belçikalı mütəxəssis Frank de Bleker bu posta təyin olunub.

AFFA İcraiyyə Komitəsinin 2024-cü il iyulun 12-də keçirilən son iclasında Hakimlər Komitəsinin sədri məsələsi müzakirə olunmuş, namizədlərdən belçikalı Frank de Blekerin zəngin beynəlxalq təcrübəsi və peşəkar fəaliyyəti nəzərə alınaraq, müsbət rəy verilmişdi.

Müqaviləyə dair bəzi şərtlərin müzakirəsinə ehtiyac yaranmışdı. Həmin məsələlərlə bağlı razılıq əldə olunduğundan, belçikalı FIFA referisi ilə 3 illik müqavilə imzalanıb.

Qeyd edək ki, Frank de Bleker iyulun 28-dən Misli Premyer Liqası və I Liqa hakimlərinin təlim-məşq toplanışına rəhbərlik edəcək.

“Sabah” UEFA Konfrans Liqasının II təsnifat mərhələsində ilk oyununu keçirib.

"Operativ Məlumat Mərkəzi-OMM" xəbər verir ki, “tələbələr” Macarıstanda İsrailin “Makkabi” (Hayfa) komandasının qonağı olub. Görüş təmsilçimizin 3:0 hesablı qələbəsi ilə yekunlaşıb.

“Sabah”ın heyətində qolları Şafranko, Cesse Sekidika və Xəyal Əliyev vurublar.

Komandalar arasında cavab oyunu avqustun 1-də Bakıda keçiriləcək.