Ermənistan Təhlükəsizlik Şurasının katibi Armen Qriqoryan İrəvanda səfərdə olan azərbaycanlı ekspertlərlə görüş keçirib.
“Operativ Məlumat Mərkəzi-OMM” Ermənistan KİV-ə istinadən xəbər verir ki, görüş "Sülh körpüsü" təşəbbüsü çərçivəsində baş tutub.
Qriqoryan bu növ görüşlərin tərəflər arasında qarşılıqlı etimadın yaradılması və mehriban qonşuluq münasibətlərinin qurulması baxımından mühüm əhəmiyyət kəsb etdiyini vurğulayıb.
O, Bakıdan gələn nümayəndə heyətinə Ermənistan və Azərbaycan arasında münasibətlərin normallaşması dinamikası və regional kommunikasiyaların açılması perspektivləri barədə ətraflı məlumat verib.
Qeyd edək ki, Azərbaycan nümayəndə heyəti fevralın 13-də Ermənistana quru sərhədinin delimitasiya və demarkasiya edilmiş hissəsindən keçərək daxil olub.
