Qafqaz Müsəlmanları İdarəsi bu il üçün Ramazan bayramının dəqiq tarixini və fitrə zəkatının miqdarını müəyyənləşdirən rəsmi fətva verib.
“Operativ Məlumat Mərkəzi-OMM” xəbər verir ki, qərar Elm və Təhsil Nazirliyi Nəsirəddin Tusi adına Şamaxı Astrofizika Rəsədxanasının məlumatlarına əsaslanır. Həmçinin, Türk Dövlətləri Təşkilatı (Türkiyə, Azərbaycan, Qazaxıstan, Özbəkistan, Qırğızıstan) nəzdində fəaliyyət göstərən Fətva Şurasının ortaq qərarı da nəzərə alınıb.
Qəbul edilən Fətvaya əsasən, bu il Şəvval ayının 1-i Ramazan bayramı, Miladi təqvimlə martın 20-nə təsadüf edir.
Fətvada orucun mühüm əməllərindən olan fitrə zəkatının vaxtı da açıqlanıb. Qaydaya görə, bu vaxt Ramazan ayının son günü - Bayram axşamı şam namazından sonraya təsadüf edir.
Qazılar Şurasının Fətvasına əsasən, imkanı olan hər bir şəxsə adambaşına 10-15 manat fitrə zəkatının verilməsi tövsiyə olunur.
Şəriətə görə, fitrə canın sədəqəsidir. İmkanı olan müsəlmanın ailəsinin hər bir üzvü üçün fitrə zəkatı çıxarması və ehtiyacı olan ailələrə verməsi vacibdir. Fətvada qeyd olunur ki, bu, hər bir ailəyə bayram ovqatı yaşatmaq məramı daşıyır.
