"Qəzzada mülki insanları qəsdən hədəfə alan İsrail mühakimə olunmalıdır"- Oman XİN başçısı

"İsrail blokada altındakı Qəzza zolağında mülki insanları qəsdən hədəfə aldığı üçün mühakimə olunmalıdır".

"Operativ Məlumat Mərkəzi-OMM" xarici KİV-ə istinadən xəbər verir ki, bu barədə Omanın xarici işlər naziri Bədr bin Həməd əl-Busaidi "ONA" xəbər agentliyinə verdiyi müsahibə zamanı qeyd edib.

Qəzzada mülki şəxslərə qarşı kollektiv cəzalar tətbiq edən, mallarına və canlarına ziyan vuran, ac qoyan və qəsdən hədəfə alan İsrailin mühakimə olunması lazım olduğunu bildirən Busaidi, İsrailin Qəzzaya qarşı qanun pozuntularına və hücumlarına son qoymaq üçün beynəlxalq ictimaiyyətin addım atması lazım olduğunu bildirib.

Ölkəsinin dialoqa əsaslanan siyasi həllin tərəfdarı olduğunu vurğulayan Busaidi, yekun həllin yalnız “sülh yolları” ilə əldə oluna biləcəyini bildirib.