OMM Redaksiyası
Qazaxıstan və Cənubi Koreya arasında münasibətlərin hərtərəfli strateji tərəfdaşlıq səviyyəsinə yüksəldilməsi barədə razılıq əldə olunub.
Qazaxıstan Prezidenti Kasım-Jomart Tokayev bu barədə sentyabrın 15-də Seulda Cənubi Koreya Prezidenti Li Ce Myonq ilə görüşü zamanı açıqlama verib. Yeni tərəfdaşlığın ticarətin genişləndirilməsi ilə yanaşı, birgə istehsal və investisiyaların artırılmasına yönələcəyi gözlənilir.
19 milyard dollara yaxın layihə müzakirə olunur
Seulda keçirilən Qazaxıstan-Cənubi Koreya biznes dəyirmi masasında qaz emalı, neft-qaz, kritik minerallar və infrastruktur sahələrini əhatə edən bir sıra sazişlər imzalanıb.
Hazırda iki ölkə arasında ümumi dəyəri 4 milyard dollardan çox olan 51 birgə layihə həyata keçirilir. Avtomobil istehsalı, maşınqayırma və metallurgiya əməkdaşlığın əsas istiqamətləri sırasındadır.
Qazaxıstanda ötən il təxminən 170 min avtomobil istehsal olunub. Astana ölkə daxilində komponent istehsalını artırmağı və tədricən tam istehsal dövrünə keçməyi planlaşdırır.
Qazaxıstanda təxminən 30 ildir fəaliyyət göstərən “Hanwha Group” süni intellekt, rəqəmsal infrastruktur, energetika və yüksək texnologiyalı istehsal sahələrində çalışır. Tokayev şirkəti həm daxili, həm də regional bazara xidmət edə biləcək yeni layihələrə baxmağa dəvət edib.
“Alatau City” layihəsinə Cənubi Koreyanın iştirakı
Danışıqlarda Almatı vilayətində yaradılması nəzərdə tutulan “Alatau City” şəhər layihəsinə də xüsusi diqqət ayrılıb. Qazaxıstan bu təşəbbüsə Cənubi Koreya şirkətlərini cəlb etmək istəyir.
Tokayev xarici investorların hüquqi müdafiə ilə təmin olunacağını bildirib: “Planlarımız çox iddialıdır. Xüsusilə “Alatau City” layihəsinin gələcək inkişafını ətraflı müzakirə etdik. Bu, böyük əhəmiyyət verdiyimiz mühüm layihədir. Şəhərin statusu ilə bağlı müddəalar Konstitusiyaya daxil edilib. Koreya şirkətlərinə bütün hüquqi təminatlar veriləcək”.
Seul Qazaxıstanı iqtisadi təhlükəsizlik üzrə tərəfdaş sayır
Cənubi Koreya Prezidenti Li Ce Myonq Qazaxıstanı ölkəsinin iqtisadi təhlükəsizliyi baxımından mühüm tərəfdaş adlandırıb. O, Qazaxıstanın enerji və təbii ehtiyatlarını, həmçinin yüksək texnologiyalar sahəsindəki potensialını vurğulayıb.
“Ölkə yalnız enerji və təbii ehtiyatlarla zəngin deyil, həm də perspektivli yüksək texnologiyalar sahəsində əhəmiyyətli potensiala malikdir. Biz qabaqcıl sənaye və rəqəmsal texnologiyalarımız vasitəsilə Qazaxıstan sənayesinin modernləşdirilməsinə töhfə verməyə hazırıq”, – Li Ce Myonq deyib.
İki hökumət qarşılıqlı ticarət dövriyyəsini iki dəfə artırmağı hədəfləyir. Cənubi Koreya kapitallı 1 000-dən çox şirkət artıq Qazaxıstanda fəaliyyət göstərir. 2030-cu ilədək nəzərdə tutulan əməkdaşlıq proqramının yeni layihələr üçün uzunmüddətli çərçivə yaradacağı gözlənilir.
