Rusiya prezidenti Vladimir Putin və Hindistanın baş naziri Narendra Modi Birləşmiş Millətlər Təşkilatının (BMT) atəşkəs haqqında qətnaməsinin yerinə yetirilməsinə və Qəzza zolağında girovların dərhal azad edilməsinə çağırıb.
"Operativ Məlumat Mərkəzi-OMM" xəbər verir ki, bu barədə Kremlin saytı məlumat yayıb.
Nəşr qeyd edib ki, tərəflər Qəzza zolağındakı vəziyyətə xüsusi diqqət yetirərək, Yaxın Şərqdəki vəziyyətlə bağlı narahatlıqlarını ifadə ediblər.
Putin və Modi BMT Baş Assambleyası və Təhlükəsizlik Şurasının qətnamələrinin effektiv icrasına, habelə bölgədəki Fələstin mülki əhalisinə humanitar yardımın dərhal, təhlükəsiz və maneəsiz çatdırılmasına çağırıblar.
Hər iki dövlət başçısı Fələstinin BMT-yə tamhüquqlu üzvlüyünü dəstəklədiklərini, həmçinin “beynəlxalq səviyyədə tanınmış əsasda iki dövlətli həll prinsipinə sarsılmaz sadiqliklərini” təsdiqləyiblər.
