OMM Redaksiyası
“Sabah”ın qapıçısı Stanislav Pokatilov UEFA Çempionlar Liqasının liqa mərhələsinin üçüncü turunda “Borussiya Dortmund”la oyunda Sofascore tərəfindən ən yüksək qiymətləndirilən futbolçu olub.
Statistik platformanın hesablamasına əsasən, qazaxıstanlı qolkiper 8,3 bal toplayıb. O, “Borussiya Dortmund”un heyətində dubl edərək komandasına 2:1 hesablı qələbə qazandıran Seru Girassini qabaqlayıb. Qvineya millisinin hücumçusu 8,0 balla qiymətləndirilib.
Pokatilov iki qol buraxsa da, altı seyvlə yadda qalıb və bir neçə təhlükəli vəziyyətdə komandasını xilas edib. Sofascore-un hesablamalarına görə, qapıçının qarşısını aldığı gözlənilən qollar göstəricisi 1,066 olub.
“Sabah”ın müdafiəçisi Eyden Makkarti 8,2 bal alıb. Cənubi afrikalı futbolçu 39-cu dəqiqədə hesabı bərabərləşdirən qolu vurub, həmçinin müdafiədə mühüm müdaxilələr edib. Beləliklə, Sofascore-un reytinqində “Sabah”ın iki futbolçusu Girassidən yüksək qiymətləndirilib.
Bu qiymətləndirmə Sofascore-a məxsusdur və UEFA-nın rəsmi mükafatı hesab edilmir. Görüşün ən yaxşı futbolçusu üçün rəsmi mükafat Seru Girassiyə təqdim olunub.
Qeyd edək ki, “Sabah” “Borussiya Dortmund”a 1:2 hesabı ilə məğlub olub.
